Anfinn Emil Stigen var ein norsk filosof. Han disputerte på Aristoteles, skreiv ei filosofihistorie og omsette Platon til nynorsk.
Bakgrunn
Anfinn Emil Stigen var fødd i Ålesund i Møre og Romsdal og døydde i Bærum i Akershus (no Viken). I 1958 endra han etternamn frå Knutsen til Stigen. Han tok examen artium i 1945, vart Master of Arts i filosofi ved University of Chicago i 1953 og mag.art. og cand.philol. med idéhistorie hovudfag ved Universitetet i Oslo i 1954.
Filosofi
I 1966 tok Stigen doktorgraden på ei avhandling om Aristoteles. I åra 1957–1959 var han universitetslektor i Oslo, i 1960–1964 avdelingsleiar ved Institut for filosofi ved Århus universitet, og frå 1964 dosent i filosofi ved Universitetet i Oslo, professor frå 1974.
Stigen skreiv fleire studiar av Aristoteles og gav elles ut mellom anna Betydning og mening, handling og ytring (1967), Gud i moderne filosofi (1968), Arbeid og menneskeverd (1973) og Menneskets frihet (1982). I 1983 kom Tenkningens historie, ei lærebok i filosofihistorie skriven for examen philosophicum.
Han omsette fleire av Platons dialogar frå gresk til nynorsk: Gjestebodet, Sokrates' forsvarstale, Gorgias og Kriton og Faidon.
Les meir i Store norske leksikon
Litteratur
- Brynjulv Bleken, Olav Næs, Anfinn Stigen: Doktordisputas om sprogstriden. Oslo 1969
- Inga Bostad (red.): Filosofi på norsk, bd. 1. Oslo 1995
- Platon: Gjestebodet. Oslo 1972
- Knut Erik Tranøy: «Anfinn Stigen», Norsk biografisk leksikon, bd. 8. Oslo 2004
