Per Kleiva er ein norsk målar og grafikar. Som grafikar er Kleiva mellom anna kjent for silketrykka sine frå perioden i GRAS-gruppa i byrjinga av 1970-åra.
Han var elev ved Statens Kunstakademi i 1955–1957. Seinare studerte han mellom anna ved Det Kongelige Danske Kunstakademi i København.
Reklame og teikning
For Kleiva vart teikneundervisning byrjinga på skoleringa hans. Jostein Øverli vart hans første lærar då Kleiva tok eit brevkurs i teikning på slutten av 1940-talet. På byrjinga av 1950-talet var han kveldselev ved Kunst- og handverksskulen i Bergen, der han gjekk på reklamelinja og bokillustrasjonslinja. Etter kvart fekk han undervisning av Alf-Jørgen Aas ved Studieatelieret i Bergen (no Bryggen kunstskule).
Akademiet
Kleiva hadde i utgangspunktet ingen idé om at han skulle bli kunstnar. Han søkte likevel Statens kunstakademi i 1955, ein institusjon som han i utgangspunktet var svært kritisk til. Til si store overraskinga kom han inn. Han vart elev av Per Krohg.
Han var professor ved Statens kunstakademi i perioden 1987–1993.
Ei avgjerande utstilling
Den amerikanske popkunstutstillinga 106 former for kjærlighet og fortvilelse, som vart vist i 1964 ved Louisiana kunstmuseum utanfor København, gjorde sterkt inntrykk på Kleiva. Denne utstillinga skulle bli eit vendepunkt for han. Her vart han presentert for ein ny estetikk med nye bilettema og variasjonar i biletspråk som inspirerte til oppbrot frå det tradisjonelle i biletmediet. Friskheten og vitaliteten, samfunnskritikken og kommunikasjonsbehovet som dei amerikanske popkunstnarane formidla, vart ein motivasjon for skipinga av gruppa 14 unge i 1965. Gruppa var eit kollegialt fellesskap og kan karakteriserast som svært lite homogen i forhold til tema og estetikk.
Les meir i Store norske leksikon
Eksterne lenker
Litteratur
- Renberg, Ulf, Harald Flor og Jan Erik Vold. Per Kleiva. Oslo: Labyrinth Press, 1986.
- Finborud, Lars Mørch & Thomas Flor. POP ETC. : Norsk popkunst 1964–1974. Oslo: Orfeus / Henie Onstad Kunstsenter, 2015.
