Gunnar Stubseid var ein norsk spelemann, forskar og skribent, utdanna ved lærarhøgskulen i Bergen og mag.art. i etnologi frå Universitetet i Bergen. Stubseid var busett på Heddi i Valle. Han bruka både den moderne hardingfela og gamle 1700-talsmodellar. Viktige læremeistrar var Dreng Ose, Olav Heggeland, Gunnar Liestøl, Anders K. Rysstad, Ingebjørg Aakre Rysstad og Otto Furholt, alle innafor setesdalstradisjonen.
Stubseid var ein spelemann med ein allsidig karriere: to utgjevingar med gruppa Slinkombas, den fyrste fekk Spellemannprisen i 1979, to plater i samarbeid med svenske Ale Møller, samt andre samarbeidsprosjekt med musikarar som Vidar Lande, Kirsten Bråten Berg, Hallvard T. Bjørgum, Bjørn Ståbi, Per Gudmundsson, Lena Willemark og Sondre Bratland. Soloplata Gorrlaus kom i 2008.
Stubseid forfatta fleire bøker, mellom anna ein biografi om Sigbjørn B. Osa. I perioden 1978 til 1988 var han redaktør av Spelemannsbladet. Frå 2003 til 2011 var han rektor ved Ole Bull Akademiet på Voss, der han mellom anna var med å etablere eit opplæringstilbod i hardingfelemakeri.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.