Atløy er ei øy i Askvoll kommune i Vestland fylke. Øya ligg nord for Vilnesfjorden, som er den ytre delen av Dalsfjorden. Øya har 450 innbyggjarar (2021) og eit areal på 37,7 kvadratkilometer.
Øya er skoglaus og når opp til 636 meter over havet på Skredvarden. På sørsida av Atløy ligg fjellknausen Brurastakken, som er eit landemerke og utsiktspunkt.
Berggrunnen på Atløy består av falda lag av gneis frå slutten av prekambrium og metasediment frå silur. Sedimenta er avsette direkte på grunnfjellet og har seinare gått gjennom metamorfose og falding. Lokalt finst også kalkstein, slik som på Brurastakken, som har fått namn etter tre kvite band av kalk som fell som eit slør nedover fjellsida.
Busetjinga på øya finst langs strendene hovudsakleg i fire grender: Kumle, Vilnes, Herland og Høyvik. Det blir drive fiskeforedling, jordbruk og fiske. På øya finst eit helleristningsfelt. Vilnes kyrkje er ei trekyrkje frå 1600-talet. I søraust ligg den gamle handelsstaden Sauesund. Bilferje går frå Gjervik på austsida av øya til Askvoll på nordsida og Fure på sørsida av Vilnesfjorden. Bru til fastlandet, Atløysambandet, er planlagt.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må vere logga inn for å kommentere.