Ingrid Storholmen er lyrikar og litteraturkritikar. Storholmen er ein samtidslyrikar med stor vilje og evne til eksperimentering, også med typografisk uttrykk og form på bøkene sine.
Storholmen er fødd i Verdal i Trøndelag. Ho tok mellomfag i litteraturvitskap ved Universitetet i Oslo i 1996 og hovudfag i litteraturvitskap ved Universitetet i Bergen i 2000. Ho studerte ved forfattarstudiet ved Høgskolen i Telemark (no Universitetet i Søraust-Noreg) i 2000.
Ho debuterte med diktsamlinga Krypskyttarloven i 2001. Forholdet til kvinner i tidlegare generasjonar er tema både i Skamtalen Graceland (2005) og i Siriboka (2007). Forfattaren reflekterer over forholdet mellom kvinner til ulike tider og den innverknaden slekta har på kven vi er.
Storholmen bryt friskt med estetiske normer og sjangerkonvensjonar og blandar drama, lyrikk og prosa i tekstane. Ho vekslar mellom nynorsk og bokmål. Siriboka og Krypskyttarloven er skrivne på nynorsk, medan Skamtalen Graceland er på bokmål.
Storholmen gav ut si første barnebok i 2012, Mora som gløymde at det var kveld. I 2014 gav ho ut dokumentarromanen Her låg Tirpitz, basert på senkinga av slagskipet Tirpitz i 1944. I 2020 kom romanen Støvberar, som handlar om ein misjonær i India.
I 2009 kom Tsjernobylfortellinger, som gjennom skiftande perspektiv og i sterke meldingar i poetisk prosa viser konsekvensane av kjernekraftulykka i 1986. Den engelske omsetjinga vart nominert til IMPAC-prisen 2015. Storholmen dramatiserte forteljinga for teater i samarbeid med regissør Birgitte Fjeld Bjørsvik, og framsyninga hadde premiere på Nord-Trøndelag Teater i 2015.
Ingrid Storholmen har vore litteraturredaktør i Morgenbladet og var med på å starte LUJ – nordenfjeldske litteraturtidsskrift, som kom med to nummer i 2003. Ho har vore engasjert i uetablerte, alternative skrivemiljø og har halde mange skrivekurs.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må vere logga inn for å kommentere.