Unni-Lise Jonsmoen

Som ungdom leid ho av tuberkulose, noko ho har skildra i den sjølvbiografiske boka Lukket dør (2017). Ho tok utdanning ved Statens håndverks- og kunstindustriskole i 1955–1959. Ho bur i Alvdal og er gift med forfattaren Ola Jonsmoen, som ho har samarbeidd med om fleire bøker.

Jonsmoen har illustrert ei rekkje skulebøker, barnebøker og diktsamlingar. Ei av dei tidlege barnebøkene var Det hende i Taremareby av Ingebrigt Davik (1960), der ho har dekorative teikningar i oransje og svart. Ho har sjølv skrive fleire bøker som ho har laga illustrasjonar til, mellom dei Svarttrosten som forsov seg (1979), Kjenner du fru Frodig? (1982) og Maren Ingeborg og Pus på Rørosmartnan (1990).

Ved sida av bokarbeidet har ho hatt mange offentlege utsmykkingsoppdrag, ikkje minst i Østerdalen, der måleria og teikningane hennar finst både på skular, på pleieheimar, i kyrkjer og i forretningar. Jonsmoen har hatt ei rekkje utstillingar, både i Noreg og i utlandet.

Teknikken hennar varierer frå enkle strekteikningar til fleirfargetrykk. Illustrasjonane viser ein humor som kan ha ein tendens til overdriving og kan strekkje seg inn i det karikerte.

Jonsmoen har vunne fleire prisar. Mellom anna fekk ho Kyrkje- og kulturdepartementet sin illustrasjonspris i 1960, 1961, 1965 og 1966, og Hedmark fylke sin kulturpris i 1989 (saman med ektemannen).

• Unni-Lise Jonsmoen i Norsk kunsterleksikon
• barne- og ungdomslitteratur
• illustrasjon

• Digitaliserte publikasjonar av Unni-Lise Jonsmoen hos Nasjonalbiblioteket

• Gunn Hvamstad og Randi Arnestad (red.). Unikt tospann : Ola og Unni-Lise Jonsmoen : to kunstnarar – ein med ord og ei med bilde. Tynset, 2018. Les boka her.