Vats er eit sokn i Vindafjord kommune i Rogaland. Det omfattar områda omkring Vatsvatnet og Vatsfjorden, ein nordgåande arm av Yrkjefjorden. Tettast busetjing er det rundt sørenden av Vatsvatnet midt i bygda.
Vats kyrkje, som ligg ved sørenden av Vatsvatnet, er ein langkyrkje i tre frå 1855.
Fylkesveg 46 går forbi Vats og nordover langs vestsida av Vatsvatnet til møte med E134 i nordenden.
Vats kommune omfatta områda på begge sider av Yrkjefjorden, likeins omkring dens nordgåande arm, Vatsfjorden og Vatsvatnet innanfor nordover til grensa til Vestland. Kommunen vart oppretta i 1891 ved utskiljing frå Skjold.
I 1965 vart Vats' område på sørsida av Yrkjefjorden lagt til Tysvær (gardane Breiddal og Stølsvik). Resten av Vats vart med tillegg av Sandeid, Vikedal aust for Vindafjorden/Sandeidfjorden, området nord for indre del av Vindafjorden av Imsland og området nord for Grindafjorden av Skjold slått saman til den nye kommunen Vindafjord. Vats hadde eit areal på 124 kvadratkilometer og 1144 innbyggjarar ved samanslåinga.
Lokal uttale [vass], ei forkortning av vatn i genitiv.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må vere logga inn for å kommentere.