Dutki Helga West lei sotnabeaivve 28.6. mielde suomagielat Horisontti-rádioprográmmas. West muitala prográmmas mo son meroštallá rasismma.
– Muhtun olmmošjovkui addit árvvu negatiivvalaš vugiin dušše danin, ahte gullo muhtun dihto olmmošjovkui. Lea leamašan jurddašanvuohki, mas sápmelaččat leat govvejuvvon láikin ja bázahallin, eaige sáhte ieža mearridit iežaset áššiin.
West muitala ahte jurddašanvuogit mat leat šaddan nálleteoriijain, leat ain oaidninláhkái Suoma sápmelaččaid dilis, ovdamearkka dihtii láhkaásaheamis.
– Dál leat fuobmán, ahte eiseválddiid ráđđádallangeatnegasvuohta sápmelaččaiguin ollašuvvá hui funet. Sápmelaččat leat guđđojuvvon eret ráđđádallamiin.
"Suoma dáfus lea sáhka suopmelaš kolonialismmas"
West oaidná, ahte rasismma sivva lea namalassii kolonialisma.
– Suoma dáfus lea sáhka suopmelaš kolonialismmas. Go dán dadjá jitnosii, de dat lea unohas máŋgasiidda. Mii eat sáhte ipmirdit rasismma sivaid, juos mii eat sáhte hállat suopmelaš kolonialismmas.
West muitala ovdamearkkaid suopmelaš kolonialismmas ja mo dat lea váikkuhan sápmelaččaide.
– Sápmelaččaid vuoiŋŋalaš vuogádaga systemáhtalaš duššadeapmi, dat ahte skuvllain eai velge sáhte fállát doarvái dieđu sápmelaččaid birra, ja maiddái nállehygienalaš dutkamušat.
West muitala ahte sápmelaččat eai vealttakeahttá álo iežage dieđe mii sápmelaččaid historjjás lea dáhpáhuvvan.
Guldal Horisontti-rádioprográmma dás.
