Muailman enzimäine puuhine satelliittu ammuttih Floridas tossargen, nenga ilmoitettih Japounien kosmossujärjestön kehittäjät.
Satelliittu lendäy kosmossah amerikkalazen kosmossuyhtivön Space X:n kandorakietal.
Lignosat-satelliittu kulletetah Kanzoinvälizele kosmossuazemale vuitinnu huoldoruaduo.
Satelliittu otetah käyttöh nenga kuun peräs.
Japounien Kyoton yliopiston tutkijat tahtotah testiiruija puuhizen satelliitan kestävytty kosmossuololois.
Missien tarkoituksennu on sellittiä, kestäygo satelliittu ylen jyrkii lämbötilan muutoksii.
Satelliittu työndäy kosmosaspäi realiaigastu tieduo tutkijoile.
Voibi kogonah muuttua kosmossutehnolougien
Tutkijat opitah suaja puusatelliitas variantua perindöllizele metallazele satelliitale.
Metallusatelliitoin probliemannu on niilöin alasajandu.
Konzu satelliitat tullah järilleh Muah, net paletah ilmukehäs. Palandan aigua metalluvuittizet voijah pahoi vaikuttua ymbäristöh da tiedoliikendeheh.
Tutkijoin mugah puumaterjualu palau ilmukehäs parem metallua.
Astronauttu da Kyoton yliopiston professoru Takao Do ennakoičči aijemba tänä vuon, gu puuhizet satelliitat roitah ylehizikse jo lähäzel tuliel aigua.
Suomes sežo on kehitetty fanierupuus mostu satelliittua, kudaman koitehlenduo on opiteltu jo se-tämä vuozi tagaperin. Suomen puusatelliittuprojektu yhtelläh vuottau vie työndämisty, eigo ni sen tarkah aigah näh ole tieduo.
Maailman ensimmäinen puinen satelliitti ammuttiin avaruuteen
