Suomen pravoslaunois kirikös azendehet seksuali- da sugupuolivähembistölöin kohtah ollah muututtu 2000-luvul aijembua pozitiivizembikse, nenga lujendau Päivännouzu-Suomen yliopiston uuzi tutkimus.
Yliopiston veres julgavo Kirikkö muutokses. Suomen pravoslaunoin kirikön barometru 2024 on enzimäine aijankohtazii nägemyksii Suomen pravoslaunoin kirikön piiris tarkastelluh tutkimus. Tutkimuksen kohtehjoukonnu oldih kirikön ruadajat da luottamusristikanzat.
Tutkimukses monipuolizesti sellitettih ezimerkikse hengellisty elostu, kirikön yhtehistölližytty da yhtenverdažuttu, ymbäristönsuojelendua da kestäjiä kehitysty sego toizii aijankohtazii tiemoi koskijoi nägemyksii. Seksuali- da sugupuolivähembistölöin azeman parandamizeh liittyjät nägemykset oldih yksi vuitti tutkimustu.
Tutkimuksen mugah pravoslaunoin kirikön ruadajis da luottamusristikanzois kolme nelläsvuittii kohtavuu poziviivizesti libo neitralizesti seksuali- da sugupuolivähembistölöin azeman parandamizeh kirikös. Puolet heis oldas sežo valmehet samastu sugupuoldu olijoin kirjahmenendän blahoslovindah. Yhtelläh vai pieni vuitti olis valmis venčaimah samastu sugupuoldu olijat puarat.
Pravoslaunoin kirikön opastukses korostetah perindöllizesti kirjahmenendiä da venčaičendua miehen da naizen välizenny dielonnu.
Luottamusristikanzat ruadajii liberualizembat
Tutkimukses tiijustettih, gu kirikön luottamusristikanzat kohtavutah seksuali- da sugupuolivähembistölöin azeman parandamizeh da heijän kirjahmenendän blahoslovindah da venčaičendah selgiehgi kirikön ruadajii pozitiivizembah. Luottamusristikanzat puaksuh ollah muallikkoloi.
Luottamusristikanzat omas ruavos ei olla suorah vastuolližuos kirikön opastuksen liinies da puolistandas. Se voibi sellittiä liberualizembua kohtavundua.
Kirikön ruadajat duumaijah luottamusristikanzoi puaksumbah, gu seksuali- da sugupuolivähembistölöin azeman parandamistu kirikös ei pie.
Teolougizen opastuksen suannuot kirikön hengellizen ruavon ruadajat, ezimerkikse papit da kantorat, yhtelläh kohtavutah ukonvemmelristikanzoin azeman parandamizeh kirikön toizii ruadajii pozitiivizembah. Muijien ruadajien joukkoh kuuluttih tutkimukses ezimerkikse kirikön virrastoruadajat.
– Uskozin, gu ruadajien pozitiivizembat duumavot riputah sit, gu teolougizen opastuksen suannuot ristikanzat ollah aktiivizesti vuitinnu kaikenjyttymien prihoduniekoin jogapäivästy elostu da nähtäh eriluaduzii eloksentilandehii ylen lähäl, nenga sanou käytändöllizen teolougien professoru Pekka Metso.
Tutkimuksen kaikkih joukkoloih kuuluttih kohtavundan laidupiät libo sežo liberualizembah kohtavunnuzien luottamusristikanzoin joukos oli konservatiivistu duumaičendua.
Naizien roulii kirikös sežo tahtotah lujendua
Tutkimukses sellitettih sežo ruadajien da luottamusristikanzoin kohtavundua naizien svättimizeh diakonissoikse. Pravoslaunois kirikös naizet täl kodvazel ei voija olla diakonissoinnu, jepiskopoinnu libo papiloinnu.
Tulokset ozutetah, gu Suomen pravoslaunoin kirikön toimijat tahtottas sellittiä, voidasgo Suomes ruveta svättimäh diakonissoi. Enäm 70 prosentua vastuajis pidi nečen šeikan sellitändiä tärgienny.
Metson mugah tulos sanou tahtos sellittiä uuzii taboi lujendua naizien roulii kiriköllizinny toimijoinnu.
