Yle Pohjas-Karjalan radivos vuvvennu 2015 algavunnuole karjalankielizele uudislähetyksele rodih kymmene vuottu. Yle Uudizet karjalakse nygöi kuulutah Ylen Areenas. Sen ližäkse Yle julguau karjalankielizii uudiskirjutuksii saital.
Uudizien luajindu karjalakse on ližännyh kielen prestiižua da uskottavuttu, nenga arvivoiččou allus algajen niilöi kiändänyh da lugenuh Päivännouzu-Suomen yliopiston livvinkarjalan opastai Natalia Giloeva.
– Kaiken voit sanuo karjalakse. Omat uudizet ozutettih karjalazile, gu karjala ei ole vai kyläkieli, kudamal paistah vai vahnat ristikanzat, ga se on moine kieli, kudamal voit sanella nygözen päivän tapahtumis yhtehiskunnas, summuau Giloeva.
Giloeva luadiu uudizii omakielizel nimel Hiloin Natoi.
Uudizienke karjalan kieleh on tulluh ylen suuri miäry mostu uuttu sanua, kui ezimerkikse alovehhallindovirrasto, kilbumalto da oza-aigahine ruadosobimus.
