Ođđasamos dieđut koronavirusis: Sámeguovllu njoammunlogut njiedjan | Anára gielda juohká ruovttuteastaid skuvlalaččaide
Yle Sápmi beaiváda dán artihkkalii ođđasamos dieđuid koronavirusa dagahan dilis eandalit davvin.
- Susanna Guttorm
- Linda Tammela
- Sáárá Seipiharju
- Anni-Saara Paltto
- Kaisa Aikio
- Linnea Rasmus
- Mira Rauhala
Sámeguovllu njoammunlogut njiedjan
Suomas leat gávnnahan odne gaskavahkko veháš badjelaš 8 000 ođđa koronanjoammuma, dieđiha Dearvvašvuođa- ja buresbirgenlágádus THL. Sámeguovllus njoammunlogut leat njiedjan maŋemuš vahkku áigge. Anára gielddas ođđa njoammumat leat odne gávnnahuvvon 5, Ohcejogas 2 ja Soađegilis 3. Eanodagas eai leat registrerejuvvon ođđa njoammumat ollenge. Eanemusat njoammumat Lappi buohccidikšunbires leat Roavenjárgga guovllus.
Anára gielda juohká ruovttuteastaid skuvlalaččaide
Anára gielda lea juohkigoahtán koronateastaid vuođđoskuvllaid ja logahaga oahppiide.
Juohke oahppi oažžu skuvllas fárrui ovtta ruovttuteasta, vai beassá álkit testet iežas jus dávdamearkkat ihtet.
Jus oahppit dárbbašit lasi ruovttuteasttaid, daid sáhttá viežžat dearvvašvuođadivššáriin dahje skuvllaid kansliijain.
Sámeguovllus 117 njoammuma vahkulohapa ja álgovahkku áigge
Lappi buohccidikšunbires leat gávnnahan mannan bearjadaga rájes oktiibuot 697 ođđa koronanjoammuma. Dearvvašvuođa- ja buresbirgenlágádusa teknihkalaš váttisvuođaid geažil THL ii leat basttán addit dárkilis loguid dán vahku álggus. Sámeguovllus Anáris ođđa njoammumat leat gávnnahuvvon vahkuloahpa ja álgovahkku áigge oktiibuot 17, Ohcejogas 6 ja Soađegilis 93. Eanodagas leat registreren dán áigodagas dušše ovtta ođđa njoammuma. Olles Suomas ođđa njoammumat leat odne maŋŋebárgga gávnnahuvvon veháš badjelaš 7 000.
Ođđa njoammumat badjel 22 500
Suomas leat gávnnanhan mannan bearjadaga rájes birrasiid 22 500 ođđa koronanjoammuma, dieđiha Dearvvašvuođa- ja buresbirgenlágádus THL. Koronavirusa dagahan buozalmasvuođa geažil buohcciviesuin divššus leat dál 682 buohcci. Buhcciin 52 leat beavttálmahttojuvvon divššus. Beavttálmahttojuvvon divššus buhcciid mearri lea njiedjan vahkuloahpa áigge 10 olbmuin.
Skuvlamánáide juhket jođánisteasttaid Eanodagas
Enontekiön Sanomat čállá, ahte skuvllas juhket juohke skuvlamánnái ovtta jođánisteastta ja geavahanrávvagiid ruoktot njoammunáitagii šaddama várás.
Dasa lassin skuvllain leat juohke skuvlamánnái njeallje jođánisteastta. Dat leat viđa beaivvi karantena várás ja daid juhket jus skuvlavázzi lea šaddan njoammunáitagii.
Heahtá skuvllas teasttaid juhket otne, eará skuvllain boahtte vahku álggus.
Sámis unnán ođđa njoammumat
THL loguid mielde koronadilli orru stáđásmuvvamin Sámis. Anáris leat otná loguid mielde guhtta ođđa njoammuma, Soađegilis njeallje, Eanodagas okta ja Ohcejogas ii oktage. Olles Lappis leat THL dieđuid mielde 218 ođđa njoammuma, main stuorámus oassi, 164, Roavvenjárggas.
Suomas 25 ođđa koronavirusjápmima
Dearvvašvuođa- ja buresveadjima lágádusa ođđasamos dieđuid mielde korona dagahan dillái lea jápmán 25 olbmo Suomas. Dál Suomas lea oktiibuot jápmán 1 815 koronavirusa geažil.
Korona dihte beavttálmahttojuvvon divššus lea 62 olbmo.
Anára njunušdoavttir fuolas áhpehis nissoniin
Anára gieldda koronadilli lea váhá čuovgasut go jagimolsašumis. Beaivvis goit gávnnahuvvojit logemat ođđa koronavirusnjoammuma, main vuollái viđátoassi lea mánáin.
Anára gieldda njunušdoavttir goit lea ain fuolas omikron-virusvariánttas, mii lea leavvanan olles servvodágas oalle jođánit.
Erenomážit njunušdoavttir lea fuolas áhpehis nissonolbmuin, geat eai leat boahkuhuvvon. Boahkuheame healbadeapmi sáhttá dágahit vearrás koronanjoammuma, mii lasiha maid áhpehisvuhtii laktáseaddi vahátlaš dávdadiliid.
Nuba njunušdoavttir Outi Liisanantti sávváge, ahte eatnit fuolahit boahkuheame váldimis, go dainna suodjalit maid máná.
Miljovnnat ruovttuteastat galget diŋgojuvvot
Suomas servvodága dehaleammos doaimmaid sihkkarastti doaimmahat, Fuolahussihkarvuođaguovddáš galgá skáhppot unnimustá 6 miljon koronavirusa ruovttuteasta skuvllalaččaid varas.
Diŋgomis lea mearridan sosial- ja dearvvasvuohtaministeriija.
Soađegili gielda lea juo geargan mearridit, ahte fállet nuvttá ruovttuteasttaid mánáide ja nuoraide.
Dan oažžumuma eaktun goit lea, ahte njoammunvárra lea gávnnahuvvon njoammunbálgáid guoradeame oktavuođas.
