Koufeinjuondu huondeksel tuou moizii tervehyshyödylöi, kudamii koufeinjuondu päivän aloh ei tariče. Tämä tiijustettih enzimäzes suures tutkimuksespäi, kudai kaččeli koufeinjuondan vaikutustu suutkien eri aigua.
Dieloh näh uudizoičči The Guardian.
Tutkimuksen mugah net ristikanzat, kudamat juvvah koufeidu huondeksil, kuoltah syväintaudiloih 31 prosentua harvembah, migu ristikanzat, kudamat ei juvva koufeidu. Sen ližäkse huondeskoufein juojil tovennägöžys kuolta muitegi enne aigua on 16 prosentua pienembi.
Sen sijah koufeidu päivän aloh juojil ristikanzoil ei dogadittu koufein tuoduloi tervehyshyödylöi.
Tutkimukses nähtih vie, gu huondeksel juovun koufein miäräl ei olluh merkičysty tervehyshyödylöin čural.
– Pagin ei ole vaigu sit, juotgo koufeidu vai et libo kui äijän, ga tärgei on koufeinjuondan suutkien aigu, sanou ravingon da epidemiolougien specialistu, professoru Lu Qi New Orleansan Tulanen yliopistospäi.
Tarkastelendas piäl 40 000 hengen tervehystiijot
Tutkimukses kačeltih 40 725 aiguhizen koufeinjuondua kymmenen vuvven aijal. Tiijot kerättih Yhtysvalloin kanzallizes tervehys- da ravingokyzelyspäi vuozil 1999–2018. Sellitykseh ozanottanuzis 36 prosentua joi koufeidu huondeksil da 14 prosentua päivän aloh.
Johtopiätökset koufeinjuondan tervehysvaikutuksis suadih verdailemal sellitykseh ozanottanuzien ristikanzoin tervehystiedoloi yheksä libo kymmene vuottu sellitykseh ozanottamizen jälles.
Tiedolehtes European Heart Journal jullatun tutkimuksen tulokset lujendettih
vie 1 463 hengen otandal. Ristikanzat piettih nedälin aijan kirjua omas koufeinjuondas sego syöndäs.
Syydy ei tietä
Tutkimukses ei selgene, mindäh huondeskoufei on syväinkeräle paras dielo.
Yksi mahtolline sellitys on se, gu koufeinjuondu myöhembä päiväl häiriččöy rungan syväinčuassuloi da moizien hormonoin, kui melatoniinan, tazuo.
Tämä vaikuttau uneh, tulehtusarvoloih da verenpaineheh, kudamat omas puoles vaikutetah syväinkerän tervehyöh.
Suurimat tervehysvaikutukset koufeis tuou kofejiinu. Yhtelläh koufeis on sežo sadoi toiziigi bioaktiivizii ainehii.
Tutkijoin mugah vuitti veres olijois tulehtuksii tuojis ainehis on huondeksil korgiel tazol, konzu huondeskoufeis olijat tulehtuksii vähendäjät ainehet estetäh niilöin vaikutustu.
