Karjalan kielen hyvin alganuh elvytändy- da kehitändyruado jatkuu iellehgi Päivännouzu-Suomen yliopistos.
Karjalan kielen opastandu da tutkimus on olluh Päivännouzu-Suomen yliopiston kanzalline eričysruado vuvves 2009 algajen. Jälgimäzet nelli vuottu Jovensuun kampuksel on ruadanuh opastus- da kul’tuuruministerstvan dengoitettu karjalan kielen elvytysprojektu.
Nygöi on sovittu, gu ruado jatkuu vähimyölleh vuodessah 2028. Yliopisto jatkau raviedu yhtehisty ruaduo kieliyhtehistönke.
Ruadoh kuulutah iellehgi paiči muudu karjalankielizen ruandan organizuičendu, opastundumaterjualoin da toizien julgavoloin luajindu, karjalan murdehien kirjukielimuodoloin da niilöin sanastoruavon kehitändy sego karjalan elvytändäh da opastandah liittyjän tutkimuksen edehpäi eiständy.
Karjalan käyttäjih niškoi keviäl 2024 pietyn kyzelytutkimuksen vastuajis suurin vuitti uskoi, gu kielen azemu paranou tulieloin kymmenen vuvven aigua.
Karjalan kieli on suomen lähin sugukieli, kudamua on paistu Suomes mugaže hätken, kui suomen kieldy. Kieli on ylen varavonalaine, ga sen elvyttämizekse da kehittämizekse ruatah ruaduo.
Jälgimäzien arvivoloin mugah Suomes on nenga 11 000 hyvin karjalakse pagizijua da ližäkse läs 20 000 mostu, ket ellendetäh karjalan kieldy libo paistah sidä vähimyölleh vähäzen.
Suomen eri čuril parahite pietäh karjalan kielen nedälii, kudai on kazvanuh ymbäri karjalan kielen päiväs 27.11.
