Skábmagovat filbmafestiválas oaidnit fas ođđajagimánu loahpas máŋgga filmma vuosttasčájáhusa.
– Suoma vuosttaseahkedis lea ovdamearkka dihte Šaamšiǩ, mii aiddo vuittii imagineNATIVE:s bálkkašumi. Dasto Unborn Biru, mii vuolgá Sundancei maiddái, justa ovdal min oidno doppe, muitala festiválahoavda Aleksi Ahlakorpi.
Skábmagovain čájehit Suoma vuosttasčájáhusa maiddái earret eará Liselotte Wajstedt bagadallan *Tystnaden i Sápmi -*filmmas. Máilmmi vuosttasčájáhussan festiválas oaidnit Ritva Torikka bagadallan dokumentára Tiina Sanila-Aikio, Suvi West oanehisfilbmaráiddu Sámi AssimiNation ja Jukka Vuorela-Morottaja bagadallan Isoisäni kieli -dokumentára.
– Bohtet filmmat birra máilmmi, Kanádas gitta Austráliai, Eurohpás, son logahallá.
Dán jagi Skábmagovaid lágidit juo 25. háve.
– Bohtet olbmot, geat leat leamaš dás jagiid mielde lágideamen. Sii bohtet muittašit doložiid Sajosii, Ahlakorpi illuda.
Festiválas ávvudit dán jagi maiddái dan, go jagis 1973 sáddejuvvon tv-prográmma, Saamelaisiltamat nappo Sámeeahket, deavdá 50 jagi. Tv-prográmma čájehit festiválas, ja dan maŋŋá láidesteaddji guovttos Matti Morottaja ja Iisko Sara sihke lágideaddji Sulo Aikio muittašit prográmma ráhkadeami.
Skábmagovaid fáddán lea ”gievrras nissonat”
Dán jagi filbmafestivála fáddán lea ”gievrras nissonat”. Danin mielde leat valjis nissonbagadalliid filmmat.
– Mii leat máŋgii fuomášan, ahte mis leat gievrras nissonat, geat barget ealligovaid. Mis leat dievva bagadallit ja maiddái váldorollain filmmain leat. Lea máŋgii leamašan jurddan, ahte dat livččii heivvolaš temá. Dál fas go geahčaimet min prográmma de fuomášeimmet ahte dál de lea dat temá gievrras nissonat, Ahlakorpi muitala.
Ovdamearkka dihte Sofia Jannok neaktá váldorollas Unborn Biru nammasaš filmmas, man Inga Elin Marakatt lea bagadallan. Dáhpáhusas oaidnit maid earret eará Elle-Máijá Tailfeathers ja Sunna Nousuniemi bagadallan filmmaid.
Koronapandemiija geažil filbmafestivála leat lágidan dušše beare gáiddusin maŋimuš guokte jagi. Dál festiválaguossit besset fas báikki ala Anárii geahččat filmmaid.
– Jáhkán, ahte olbmot leat dál moadde jagi vuordán, ahte besset fas geahččat buriid filmmaid buollašis ovttas ustibiiguin, rábmosta festiválahoavda.
Bileahtaid vuvdet neahta bokte
Bileahtaid dáhpáhussii sáhttá oastit Tiketti-bálvalusa bokte. Ahlakorpi vuohttá, ahte olbmuid geasuhit sihke ođđa filmmat ja maid boarrásotge klassihkkárat.
– Maiddái min guovssahasteáhtera čájáhusat geasuhit, dadjá Ahlakorpi.
Skábmagovaid ođđa neahttasiiddut almmustuvvet dán vahkus, festiválahoavda lohpida.
Eamiálbmogiid filbmafestivála Skábmagovat lágiduvvo Anáris 26.–29.1.2023 ja neahta bokte 29.1.–6.2.2023.
