Detnui vurdojuvvo fas ruoššaluosa goargŋun boahtte geasi. Bárahis jagiid ruoššaluossa goargu jogaide gođđat. Suopma ja Norga leat fas ráhkkaneamen eastadit vierisšlája leavvama.
Ohcejoga gielda fas lea ráhkkaneamen plánet bálvalusaid dan várás, ahte ruoššaluossa Deanus šaddá nu daddjon ođđa normálan.
Ohcejoga gieldda guolástanturismma máhtu ovddidanfidnu prošeaktaáššedovdi Elias Teriö lea leamaš fitnodatdoalliid veahkkin plánemin guolástanturismma bálvalanollisvuođaid ja ruoššaluosa vejolašvuođaid.
Mállen sis leamašan ovdamearkka dihte Alaska pink salmon guolleturisma.
– Ruoššaluosa várás leat boahttevaš gesiide plánegoahtán iešguđetlágan bálvalusaid. Ruoššaluosa dahje pink salmon maŋis turisttat vulget Eurohpás gitta Alaskai, dasa livčče Deatnogáttisge ollu vejolašvuođat.
Turisttaide leat plánen guolásteami birra vásáhusaid, earret eará gáddeguolásteami oktavuođas oahpahit maiddái čollet guoli ja málestit das biepmu.
– Badjelmearálaš guoli sáhtášii de maiddái skeŋket guovllu olbmuide, dego Alaskas dahket, Teriö muitala.
Son lea jo gullan, ahte boahtte gease Deatnogáddái livčče boahtimin turistajoavkkut bivdit ruoššaluosa.
Norga geahččala buođuin caggat ruoššaluosa goargŋuma
Luondduriggodatguovddáža dutki Jaakko Erkinaro lohká, ahte Norgga doaimmat lea dehálaččat das, man ollu ruoššaluosat besset goargŋut Detnui. Norga lea plánen ođđa buođu ceggema.
– Jus Norgga doaimmat dollet ja ruoššaluosaid bastet caggat juo Vuolle-Deanus, dalle dat eai olle Badje-Detnui Suoma beallái, Erkinaro dadjá.
Vel gávdno uhccán diehtu ruoššaluosa váikkuhusain deanuluosa ceavzimii, muitala Erkinaro.
Son lohká, ahte vaikko ovddasvástádus ruoššaluosa dustemis lea Norgga bealde, maiddái Suopma lea ráhkkanan ruoššaluosa goargŋumii.
Guolledoalloguovllus leat fierpmit dan várás, ahte ollu ruoššaluosat besset buođu čađa goargŋut. Guolástanvuoigatvuođa oamasteaddjit sáhttet sierralobiin bivdit ruoššaluosa.
– Jus ruoššaluosat gorgŋot Detnui, daid bivdui lea lohpi dego lei maiddái geassit 2023.
Deanuluosa bivdin lea gildojuvvon aŋkke Suoma bealde maiddái boahtte geasi. Eará guollešlájaid bivdin lea lobálaš maiddái turisttaide.
