Eanandolliid ealáhatlágádus Mela fállá dál boazodolliide oaivvilduvvon doarjjabálvalusa Beroš boazodoallis.
Doaibmanmálle fállá máŋggalágan vugiid boazodoalli buresbirgemii, háleštanveahkis gitta fitnodatdoalu hástalusaid čađa rávvemii.
Dakkár ortnet leamašan jo guhkkit áigge fállun boanddaide. Boazodoallit leat ieža sávvan dakkár bálvalusa, muitala Mela bargonákcenrávvejeaddji Eija Tammela.
Boazodoallu lea jo guhká leamašan roasu siste, go dálvvit leat šaddan ain garrasabbon dálkkádaga ja muohtadili dáfus. Sámebálgosat-searvvi ságadoalli Tiina Sanila-Aikio dieđu mielde dat lea jo čuohcán badjebearrašiidda erenomážit ekonomalaččat.
– Visot ruđat, maid leat seastán, de leat golahuvvon jo. Go oaidná man garra dilli bohccuin lea, iige leat šat mihkkige maid sáhtášii bargat ja ruđat nohket, de dat lea veadjemeahttun dilli.
Badjeolbmuid ruđat gollet johtilit earret eará danin, go jikŋon guohtuneatnamiid dihte bohccuid gártet biebmat eambo. Fuones guohtuma dihte bohccot eai biso čoahkis ja ealu birra galgá vuodjit jámma, amas dat bieđganit miehtá bálgosa. Divron eallingolut dego bensen, váttásmahttet dili vel ovddežis, čilge Sanila-Aikio.
Sápmelaččaid birgenkultuvra sáhttá njoazidit veahki ohcama
Mela Beroš boazodoallis -doaibmanmálle fállá nuvttá háleštanveahki ja persovnnalaš bagadallama earret eará veadjimii, olmmošgaskavuođaide ja fitnodatdoalu hástalusaide. Doaibmanmálle olis bastet maid veahkehit gávdnat eará dárbbašlaš áššedovdiid ja juolludit oastinbálvalusčatnašumi 500 euro ovddas, mainna sáhttá máksit mielladearvvašvuođabálvalusaid.
– Mii leat boanddaiguin bargan dakkár doaibmanmálliin áŋgirit jo gávcci jagi. Dat lea hui konkrehta doarjja árgabeaivválaš eallimii iešguđet lágan dilis. Mii mannat olbmo lusa ja smiehttat ovttas mo dás ovddos, lohká Eija Tammela.
Tammela maid lea vuohttán, ahte boazodoalus máŋgasat gillájit bargováibamis.
– Dalán go dovdagoahtá, ahte alddis nohket goansttat ja vuogit, ja ii dieđe mo veadjá ovddosguvlui dahje ruđat nohket. Dalle duođái gánneha dáhtut veahki, deattuha Tammela.
Tiina Sanila-Aikio mielas lea dehálaš, ahte dakkár bálvalus lea dál fidnemis. Son goittot lokte ovdan sápmelaččaid birgenkultuvrra, mii máŋgii váikkuha dasa, ahte sámebadjeolbmot eai álo máhte ohcat veahki áiggil. Su mielas lea dehálaš váldit dán barggus vuhtii maid sámeduogáža ja sámegielaid.
– Dat lea stuorra lávkki duohken, ahte olbmot bivdet veahki. Lihkus dán áigge lea jo vehá álkit hállat váttis áššiid birra ja sávan, ahte dat roahkkatvuohta gávdno doppe. Jáhkán, ahte dalle go olbmot bivdet veahki, de lea maŋimuš boddu, dadjá Sanila-Aikio.
