Sisministtar Mari Rantanen oažžun dieđuid mielde sámiid sajádat njealji riikka guovllu álbmogin ii leat ágga sierrameannudeapmái dorvobáikeohcanproseassas.
Sámi parlamentáralaš ráđđi (SPR) lea gáibidan Ruošša sápmelaš dorvobáikeohcciide buoret sajádaga Norgga, Ruoŧa ja Suoma dorvobáikeohcama vuogádagain. SPR lea davviriikalaš sámedikkiid ovttasbargoorgána.
Ovdamearkka dihte Ruošša beal sápmelaš ja eamiálbmotaktivista Andrei Danilov lea badjel golbma jagi vuorddašan vástádusa dorvobáikki oažžumii Norggas. Danilov birra muitala NRK Sápmi.
Dego Danilov, leat muhtin earáge Ruošša beal sámit ohcan dorvobáikki Davviriikkain dan maŋŋá go Ruošša fallehii Ukraina. Danilov ballá šaddat giddagassii, jus bággehalašii máhccat fas Ruššii.
Dublin-ásahus caggá sierrameannudeami sámiid várás
Nu daddjon Dublin-ásahusa geažil Norgga Olgoriikalaččaid direktoráhtta biehttalii álggos gieđahallat Danilov ohcamuša. Ohcamuš fertii gieđahallot Sveicas, gosa sus lei visum Schengen-guovllus.
Dublin-meannudeamis lea sáhka dorvobáikeohcciid gieđahallanstáhta meroštallamis EU:s. Meannudanvuogi vuođđun lea Dublin III -láhkaásahus, masa buot EU-riikkat leat čatnasan ja mas Suopmage ii sáhte spiehkkasit, dadjá sisministtar Rantanen.
SPR cealkámušas daddjo, ahte Sámi dorvobáikeohccit galget beassat ieža válljet guđe Davviriikkas sii ohcet dorvobáikki, iige sin galgga máhcahit dan riikii gosa sii álggos bohte, dego Dublin-ásahus geatnegahttá.
Suomas dorvobáikeohcamušaid gieđahallá Sisafárrendoaimmahat
Suomas sámiid rivttiid guoskevaš áššiin vástida eanašosiid riekteministeriija. Sisministeriija ovddasfástádussan fas leat dorvobáikeohcama láhkaásahusat ja politihkka.
– Guđege dorvobáikeohcamuš čovdojuvvo individuálalaččat ohcci dahkan čielggadeami ja riikkadieđuid vuođul iige oktage olmmošjoavku fidne sierrameannudeami guorahallamis, lohká sisministtar Rantanen šleađgapoasttastis Yle Sápmái.
Dorvobáikeohcamušaid dikšu Suomas Sisafárrendoaimmahat iige sisministaris dahje -ministeriijas leat riekti mannat guoskat ovttaskas ohcamušaid gieđahallamii, Rantanen muitala.
SPR: dorvobáikepolitihkka galgá heivehuvvot sápmelaččaide
SPR gáibida Sámi dorvobáikeohcciide rievtti ássat sámeguovllus ja doalahit sámegiela ja kultuvrra. Dasa lassin SPR dáhttu Davviriikkaid heivehit dorvobáikeohcama politihka sápmelaččaide ja dovddastit Ruošša sámiid erenomáš sajádaga eamiálbmogin Sámis.
– Riikkaráját mat sirrejit min álbmoga, leat mearriduvvon min haga, ja dat eai sáhte váikkuhit min vuoigatvuhtii oažžut suodjalusa, birgejumi ja kultuvrralaš ceavzima, čállojuvvo SPR cealkámušas.
