Boahtte jagi árvalit fas Detnui goargŋut olu ruoššaluosa. Dan galggašii máhttit atnit ávkin, dadjá Ohcejoga gieldda prošeaktaáššedovdi Elias Teriö.
– Dat addá vejolašvuođa ealáskahttit fitnodatdoaimma, mii nogai go Deanu luosa ii ožžon šat bivdit. Sáhttá ahte fitnodatdoallit gártet vehá ođasmahttit bálvalusaid, go turisttaid gáibádusat leat lassánan.
Ohcejoga gielddas lea jođus prošeakta, man ulbmilin lea ovddidit guolástanturismma. Teriö lea čohkken viiddis raportta, mas leat muhtin jurdagat das, mo guolásteami ja eandalit ruoššaluosa sáhtášii ávkkástallat buorebut.
Teriö máinnaša ovdamearkan, ahte turisttaide sáhtášii fállat vejolašvuođa bivdit ruoššaluosa ja juohkit sállaša báikkálaččaiguin. Dákkár vuogi son lea gávdnan Alaskas, go lea dutkkadan mo doppe ávkkástallet ruoššaluosa.
– Turisttat bivdet ruoššaluosaid ja beali dain borret ieža ja beali addet báikki olbmuide borramušguollin, geat eai šat man nu sivas ieža guolás. Dát sáhtášii leat okta vuohki ollašuhttit vásttolaš turismma Deanus, muitala Teriö.
Alaskas ruoššaluossa lea dehálaš guolli borramuššan, muhto maiddái turismasuorggis. Máŋggat fitnodagat fállet guolástanreaissuid, gos bivdet namalassii ruoššaluosa. Ovdamearkka dihte turisttain lea vejolašvuohta beassat beaivái bivdit ruoššaluosa Kenai-johkii guolástusofelaččain.
Fitnodatdoalli oaidná ruoššaluosas vejolašvuođa lassedietnasii
Turismafitnodatdoalli Tiina Salonen lea jo mannan ja ovdditge gease fállan ruoššaluosa turisttaide borramužžan. Son ii hálit iežas restoráŋŋas fállat norgalaš šaddaduvvon luosa ja Altántta luosage ii leat sáhttán fállat.
– Dat lea hui buorre borramušguolli. Olbmot váillahit luosa ja ruoššaluossa lea buorre molssaeaktu. Máŋggat bohte ovddit jagi dan dihte deike boradit go gulle, ahte dáppe lea fállun ruoššaluossa, muitala Salonen.
Su turismafitnodat lea áigumin boahtte gease maid fállat dolgevuoggaoagguma nissonolbmuide, man ulbmilin lea bivdit ruoššaluosa. Salonen jáhkká, ahte ruoššaluosa sáhttá buresge ávkkástallat iešguđetláhkai boahttevuođas ja oažžut dainna lassedietnasa.
– Iihan dieđusge sáhte dušše ruoššaluosa ala buot rehkenastit, muhto gal mun jáhkán, ahte das leat buorit vejolašvuođat turismaealáhusas.
Biilafitnodatdoalli Kari Guttorm Ohcejoga Báršši gilis ii goittot jáhke, ahte ruoššaluossa buvttášii ođđa vejolašvuođa dinet Deanuleahkái.
– Dathan álgá guohcadit áigá jo, ii das leat gal midjiide miige ávkkiid. Doppe gos mun orun, de ii leat šat borahahtti.
