Lappi buresbirgenguovllu seastindoaimmat leat dáid áiggiid ságastahttán olbmuid davvin. Buresbirgenguovllus leat ekonomiija vuogáidahttindoaimmat ja seasttuid šaddet dahkat.
Yle Sápmi jearai guovloválggaid evttohasain Ohcejogas, Eanodagas ja Anáris, mo guovlostivrras galggašii dáhkidit sámeguovllu bálvalusaid.
Guovloválggaid evttohas Sinikka Labba (RÁB) Eanodagas oaivvilda, ahte sámebálvalusaid dáhkideapmái guovlostivrras dárbbašuvvo ovttasbargu.
– Doaivvu mielde dat geat besset váikkuhit barget hui áŋgirit, ahte dáppe Sámis livččii buorre eallit ja orrut. Mis leat sámeguovllus buorit evttohasat ja mii galgat ovttasbargat, Labba dadjá.
Labba mielas bálvalusaid dili lea váttis buoridit dán ruhtadilis.
– Bálvalusat eai oaččoše mannat heajut guvlui, miihan dárbbašit maiddái lagašbálvalusaid.
Bálvalusaid ovddideapmi váttis dán ruhtadilis
Ohcejohkalaš guovloválgaevttohas Ara Aikio (SDB) lohká, ahte vaikko seasttut leat boahtimin, de bálvalusat leat mannan rivttes guvlui. Bálvalusaid ovddideapmi lea dán ruhtadilis goittotge váttis ja hiđis.
Son oaivvilda, ahte mánáid ja bearrašiid áššiid ovddideapmi lea dehálaš maiddái davvin.
– Jus mánáin dahje bearrašiin lea heahti, de dat eai dárbbašivčče vuolgit Roavvenjárgii.
Su mielas sápmelaš bargit leat dehálaččat buresbirgenguovllus.
– Min álbmot lea uhci ja jus doppe ii gii nu doala jiena de eai dat áššit dalle ovdán.
Guovloválgaevttohas Kirsti Saijets (RÁB) Anár gielddas lea fuolas bálvalusaid čohkkemis guovddážiidda.
– Mis leat guhkes gaskkat dáppe davvin bálvalusaid gurrii jo dál. Jus bálvalusat dál jo geahpeduvvojit de gal dat mátkegolutge bohtet máksit.
Son oaivvilda, ahte sámegielagiidda galggašedje dáhkiduvvot báikkit guovlostivrras.
– Sámegielagat ja sápmelaččat fertejit beassat geavahit bálvalusaid sámegillii.
Gieldda- ja guovloválggaid válgabeaivi lea boahtte sotnabeaivve.
