Anára girkosiiddas livžžodit vuot gávttehasat go Ijahis ija festiválavahkkoloahpa álgá. Dán jagi lágideaddjit leat geahččalan plánet festivála nu, ahte dat fálašii juohkehažžii juoidá, dadjá Ijahis ija dáiddalaš jođiheaddji Anna Näkkäläjärvi-Länsman.
– Mis gal lea dán jagi oalle viiddis prográmma, doppe lea hui ollu maid vásihit dego musihkka, dánsun, mánáidbeaivi ja árbevirolaš sámemusihkka, son logahallá.
Festivála veahkkebuvttadeaddji Aleksi Ahlakorpi muitala, ahte su buoremus festiválatipsa lea návddašit festiválas.
Festiválas loaiddastit násttit miehtá Sámi
Dán jagi Ijahis ija lávddi ala lávkejit sámenásttit Ruoŧas, Norggas ja Suomas. Festiválas beassá gullat sihke árbevirolaš Sámi šuoŋaid ja ođđaáigásaš musihka.
– Musihka bealis mis leat ollu máŋggabealat artisttat, muitala veahkkebuvttadeaddji Aleksi Ahlakorpi.
KEiiNO doallá bearjadat eahkeda maŋimuš konseartta ja Felgen Orkester fas lávvardaga. Dasa lassin maiddái Maxida Märak, Solju ja Katarina Barruk loaiddastit festiválavahkkoloahpas.
Ahlakorpi muitala, ahte áibbas ođđa artisttat dán jagáš festiválas leat goit Gabba ja KEiiNO.
Dasa lassin árbevirolaš sámemusihkka leamašan álo dehálaš oassi Ijahis ija festiválaprográmmas.
– Juoigansuopmanat mis leat oalle viidát go leat Ohcejogas, Láhpoluobbalis ja Čeavetjávrris, Näkkäläjärvi-Länsman illuda.
Festiválas juoigaba Niillas Holmberg ja Mathis Ole Vars. Dasa lassin Hanna-Maaria Kiprianoff rohttesta leuʹdd.
Taleantalávddis ollu ođđa artisttat
Taleantalávddi konsearttaid beassá čuovvut lávvardaga diibmu 16.30 ovddos guvlui Sajosis. Taleantalávddi guovddážis leat ođđa Sámi artisttat, geaid birra it leat vealttakeahttá vel gullange.
Ahlakorpi cavgila, ahte Taleantalávddis beassá gullat earret eará nuortalašgielat ráp-musihka. Doppe čuojahit Gáva-Áslat Laura ja Ohcejoga Guitar Heroes, Janita & Brede, Kootkmiõhtt sihke Ulpu já usteveh.
Loga maiddái: Njávval ja garpái – Erke Eriksen áigu ovttastahttit luođi, heavy metálla ja klassihkalaš musihka
Duodjemárkanat guktuid beivviid
Duodjemárkanat leat dehálaš oassi sámiid festiválain, ja maiddái dán jagi Anárii bohtet duojárat miehtá Sámi vuovdit dujiideaset.
Ijahis ijas eai leatge ovdal leamašan ná ollu duojárat, dadjá Ahlakorpi.
Duodjemárkaniidda bohtet guktuid beivviid Duodji Shop, Erika Huuva, Haraldin paja / Utsjoki handicraft, Katja Magga Design, Mucca Design, Kristine Eira sihke Sompion lahja ja koru. Lávvardaga duodjemárkaniin lea mielde maiddái Ami Avellán Jewellery.
Duodjemárkaniidda beassá festiválabileahtain ja dat álget dalán go festiválaguovlu rahpasa.
Prográmma maiddái nuorabuidda
Ijahis ijas lea juohke jagi prográmma maiddái mánáide ja nuoraide. Mánáid ja nuoraid beaivi lágiduvvo otne bearjadaga iđitbeaivve, muitala mánáid ja nuoraidbeaivvi prošeaktabargi Ánne-Sofe Niittyvuopio.
– Mis leat ollu bargobájit, ovdamearkka dihte áhkut dollet nuoraide duodjebáji, mis lea leuʹdd bargobádji, Čalmmiid čađa -čájálmas nuoraide ja mánáide vel disko, Niittyvuopio dadjá.
Dán jagi lea maiddái Násttážat-konsearta nu mo lávege, ja doppe besset mánát ja nuorat ieža loaiddastit. Dasa lassin konsearttas lea mielde Yle Sámi Šuokŋabiedju.
Násttážat-konsearta álgá bearjadaga diibmu 13.
Ođđa oanehisfilbma čájehuvvo bearjadaga Siiddas
Festiválavahkkoloahpa oktavuođas Anáris beassá oaidnit Dáidaga ovddidanguovddáš Taike ođđa filmma Bálggis. Oanehis dokumentárafilmmas čuvvojuvvojit golbma nuorat buolvva sámedáiddára. Sii leat sirkusdáiddár Aleksi Niittyvuopio, graffitidáiddár Sámi Hustler ja ráidogovvadáiddár Sunna Kitti.
Filmma lea bagadallan sámekultuvrra leanadáiddár Auri Ahola.
Filbma čájehuvvo otne bearjadaga diibmu 15 Sámemusea Siiddas. Dilálašvuohta lea buohkaide rabas.
Festivála streamejuvvo, ja Yle maid sádde njuolggosáddagiid
Festivála konsearttaid sáhttet buohkat čuovvut neahtas Ijahis ija iežas livestream-sáddagis.
Dasa lassin Yle Sápmi ja Yle Lappi sáddeba báikki alde streamsáddagiid Yle Areenas bearjadaga ja lávvardaga. Dain leat mielde sihke festivála lágideaddjit, artisttat ja guossit. Sáddagat álget guktuid beivviid diibmu 18. Bearjadaga videosáddaga sáhttá geahččat dáppe.
Olles festiválaprográmma beasat lohkat Ijahis ija -neahttasiiddus.
21.8.2023 dii. 14:05 Divvojuvvon govvatekstii diehtu, ahte Felgen Orkester lea leamaš Ijahis Idja -festiválas jagis 2018.
