Kulmâ saavâjođetteijee oovtâ ive siste – Anarâšah seervi jeessânmeeri já toimâ lii uccom

Anarâšah-servi lii lamaš moiveest. Moonnâm ive paijeelmiärálii ihečuákkimist väljejii uđđâ saavâjođetteijen Inka Kangasniemi. Seervi jesâneh iä tuhhiittâm tom ko seervi kuhes áigásâš saavâjođetteijee já vuáđudeijee jeessân Anu Avaskari tuárjui Sämitige tievâsčuákkimist sämitiggelahâiävtuttâs.

Luuvâ lase: Anarâšah-searvvi lahtut eai dohkkehan Anu Avaskari politihkalaš doaimmaid Sámedikkis – válljejedje ođđa ságadoallin Inka Kangasniemi

Saavâjođetteijee Inka Kangasniemi ij kiergânâm kuhháá toimâđ saavâjođetteijen, ko algâkeesi saavâjođetteijee roolin njuškij värisaavâjođetteijee Jarmo Katajamaa.

– Inka piivdij persovnlij suujâi keežild muu väldiđ saavâjođetteijee pargoid vuástá. Sust lijjii pargohuápuh já maaŋgâlágán projekteh, moh estii suu toimâm aktiivlâš saavâjođetteijen, iätá Katajamaa.

Inka Kangasniemi ij kommentistám ääši Yle Sáámán.

Hiäđukocceem lii tuálvum naavcâid eres tooimâin

Anarâšâi kirkkopase láá viättám jo maaŋgâ keesi já anarâšah-servi lii lamaš orniimin tábáhtus maaŋgâid iivijd Aanaar servikuddijn. Taan keesi servi ij lamaš fáárust orniimin tábáhtus. Servi lâi vuávám meid orniiškyettiđ pááru-ehidijd, mutâ vuáváámeh iä lah olášum.

Jarmo Katajamaa muštâl suijân tom, ete hiäđukocceemproosees lii lamaš nuáđđin, te naavcah iä lah rijttám. Sun muštâl ete tábáhtusah láá ain toimâvuáváámist já ulmen lii taid ovdediđ já orniđ.

– Ulmen lii, ete puoh naavcah iä moonâ hiäđukocceem paargon, mutâ ličij meid seervi tehálumos tooimâ ađai anarâšâi čokkim siärvusin já kulttuur já ärbivuovij ovdedem já paijeentoollâm.

Katajamaa uáiná seervist pyeri puátteevuođâ. Jeessânucâmušah puátih ubâ ääigi já uási tain máhđulávt perustškyetih meid servâđ seervi keevâtlijd toimáid.

– Jeessânmeeri lii tääl vááijuv 200 jesânid. Anarâš siärvus háárán tot lii váhá liijkás uccáá. Mij tuáivup, ete puoh anarâšah kulâččii siämmáá siärván.

Seervi jeessânmeeri lii iivij ääigi uccom, ko ive 2015 seervist lijjii 300 aktiivjesânid.

Tivvum 29.9. tijme 14.48: Paječallust muštâlijm vistig, ete seervi jeessânmeeri lassaan, mutâ olmânáál tot lii uccom. Ive 2015 seervist lijjii 300 aktiivjesânid. Lasettum meid liŋkkâ uđđâsân, mast muštâlep seervi čuákkimist, mast jienâstii Avaskari luáttámušâst.