Suopmelaš neavttár Jasper Pääkkönena ja investerenfitnodat Korpi Capital hoteallafidnu Naŋŋânjárgii, Anárjávrri gáddái lea ovdáneamen. Lávas dahkkon váidagat hilgojuvvojedje alimus hálddahusrievttis.
Fidnu birra lea gevvojuvvon garra digaštallan, ja máŋgasiid mielas hotealla ii galgga hukset luonddudilát Naŋŋânjárgga geahčai. Báikái ii doalvvo albma luodda iige doppe muđuige leat gárvves infrastruktuvra.
Anár gieldda váldostivrra mearridii dohkkehit gáddeláva jagis 2021. Gáddelávas bohte golbma váidaga, muhto Davvi-Suoma hálddahusriekti ja alimus hálddahusriekti gomihedje buot váidagiid.
Jasper Pääkkönen muitala, ahte dál go lávva lea sihkkarastojuvvon, sis álgá čielggadanbargu.
– Dego mii diehtit, lohpeproseassat bistet guhká, nappo mange konkrehta áššis dego huksemis dahje hotealla gárvvásmuvvama áigetávvalis lea veadjemeahttun dadjat dađi eambo.
Pääkkönen árvala, ahte čuovvovaš háve son bargá fidnuin aktiivvalaččat go álget hábmet arkitektuvrra.
– Muhto ahte goas dán muttus leat, dan in dieđe, dadjá Jasper Pääkkönen.
Anára luondduustibiid searvvi ságadoalli Ilkka Roininen ii dohkket fidnu, vaikke dál lávva leage gávnnahuvvon lágalažžan. Son oaivvilda, ahte Anárjávrri gáddái eai dárbbaš ovttage ođđa hotealla lasi.
– Naŋŋânjárga lea ain boasttu báiki. Mii sávvat, ahte ruhtadeaddji dagašii rivttes mearrádusa nappo geassádivččii fidnus. Min áddejumi mielde dakkár hoteallaid eai Anárjávrri gáddái hálit, lohká Roininen.
Nubbi hoteallafidnu Anáris vuostebiekkas
Maiddái Anára Almaanjárgii lei ulbmilin hukset stuorra luksushotealla, muhto fidnu vuoittáhalai luondduárvvuide jo nuppe háve mannán duorastaga.
Anára váldostivra hilggui Almaanjárgga gáddeláva dohkkeheami jienaiguin 14–13. Seamma jienastanboađus šattai maiddái diibmá, go váldostivrras gieđahalle vuosttas geardde ášši.
Almaanjárgga hoteallafidnu lea bohciidahttán ollu dovdduid gieldalaččain. Máŋggat gieldalaččat leat sakka vuostálastán luksusturismaguovddáža Anára meahcceguvlui. Ovdal mannán duorastaga váldostivrra čoahkkima geigejuvvui maiddái adreassa, mas bivde hilgut láva.Adreassa ledje vuolláičállán sullii 200 olbmo, mii lea njealjádas Anára girkosiidda ássiin.
Luksushoteallafidnu duogážis lea fitnodatdoalli Veikko Lesonen ja su figgamuš oažžut eatnamiiddis ala gáddeláva, mii attašii vejolašvuođa hukset luksusturismaguovddáža.
Lesosa plánain leamašan oažžut huksenvuoigatvuođa sullii 5500 geardeviidodatnjealjehaskilomehtera ovddas sullii 50 hektára guvlui Anárjávrri gáddái, lahka Anára girkosiidda.
