Anára gielddadálu čoahkkinlanjas lea dievva olmmoš. Váldostivrra ságadoalli Janne Tervahauta almmustahttá jienasteami bohtosa.
– Almaannjárgga gáddelávva hilgojuvvo, Tervahauta dieđiha.
Čoahkkinsále álbmot beanta gieváska ilus. Anára váldostivrra hilggui ikte duorastaga Almaanjárgga gáddeláva dohkkeheami jienaiguin 14–13.
Jienastusas ledje vuostálágaid váldostivrra evttohus gáddeláva dohkkeheamis ja váldostivrra lahttu Pirita Näkkäläjärvi guottihuvvon evttohus hilgut dan.
Čoahkkinsále olggobealde lágiduvvui ovdal čoahkkimastima maiddái ráfálaš miellačájeheapmi, mas báikkálaš Sunná Nousuniemi lei mielde. Sutnje váldostivrra mearrádus lei illusáhka.
– Lea ihána fuomášit ahte gieldda politihkkárat leat gullan min. Gánneha váldit beali ja geahččalit váikkuhit. Sávan ahte mii buohkat joatkit suodjalit Anárjávrri, son dadjá.
Gieldalaččaid vuosteháhku gánnehii
Hoteallafidnu lea bohciidahttán ollu dovdduid gieldalaččain. Máŋggat gieldalaččat leat sakka vuostálastán luksusturismaguovddáža Anára meahcceguvlui.
Seammalágan vuostálastima lea vásihan maiddái Jasper Pääkkönen hoteallafidnu Naŋŋânjárgii, muhto su fidnu Anárjávregáddai ovdána. Naŋŋânjárgga gáddelávva Anárjávrri gáttis lea dál lágalaš.
Ovdal váldostivrra čoahkkima geigejuvvui maiddái adreassa, mas bivde hilgut láva.
Adreassa leigga geigemin Jaana Laisi, Annika Witting ja Emma Nokela Anáris.
– Mii leat dáppe Anára gielddadálus buktimin ovdan Anára girkosiidda ássiid jiena ja doarjumin sin oaiviliid Almaanjárgga gáddelávvaáššis, dadjá Laisi.
– Mii leat dáppe maiddái Anárjávrri bealis, mii leat buktimin Anárjávrri, luonddu jiena ovdan ja suvdilis mátkeealáhusa jiena, lasihastá Witting.
Vuostálastit lohket doaibmat suvdilis lávvaplánema beales.
– Mii vuostálastit dán danne go dat lea gierdameahttun Anárjávrri lundui ja guovllu mehciide. Dat lea maiddái sosiálalaččat gierdameahttun, dan vuostálastet maiddái Sámediggi ja girkosiidda ássit, Jaana Laisi lohká.
Annika Witting maiddái fuomášuhttá gieldda linnjemiin hoteallafidnuid ektui.
– Anára gielda lea linnjen, ahte ođđa hoteallafidnut galggašedje boahtit infra oktavuhtii, ja dát fidnu lea dan olggobealde ja dagahivččii issoras stuorra huksenbargguid ja geainnuid viiddideami.
Fidnu gopmánii dál juo nuppi háve
Gáddelávva lei dál jo nuppádassii váldostivrra gieđahallamis. Fidnu gopmánii seamma jienastusbohtosii go ovdditge háve.
Váldostivrra vuosttas várreságadoalli Anu Avaskari ii beassan jienastit go sus leat eatnamat Almaanjárgga guovllus, muhto su várreláhttu Anne Tuovila jienastii gáddeláva dohkkeheami beales. Avaskari ieš lea goittotge duđavaš váldostivrra mearrádussii.
– Dáthan lea hui buorre jienastusboađus, ahte Almaanjárgga gáddelávva hilgojuvvui.
Luksushoteallafidnu duogážis lea fitnodatdoalli Veikko Lesonen ja su figgamuš oažžut eatnamiiddis ala gáddeláva, mii attašii vejolašvuođa hukset luksusturismaguovddáža.
Lesosa plánain leamašan oažžut huksenvuoigatvuođa sullii 5500 geardeviidodatnjealjehaskilomehtera ovddas sullii 50 hektára guvlui Anárjávrri gáddái lahka Anára girkosiidda.
