Juohke jagi Eanodaga duottarlogahahkii ohcalit muhtin nuorat maid Mátta-Suomas. Dálá dilis logahagas leat moaddelot oahppi, muhto stuorát oahppijovkuige livčče sadji. Vejolašvuohta beassat logahatávdnasiid lassin oahppat maid meahccedáidduid ii goit leat geasuhan nu bures go vurde.
Meahcceoahput leat goit áidnalunddot vejolašvuohta Suoma logahagain.
– Mii fállat iešguđetlágan meahccegurssaid studeanttaide. Mis leat meahcásteaddjidutkkus, meallun, meahccevuosttasveahkki ja dan dakkárat ovdamearkka dihte, muitala hálddahuslašrektor Riitta Peltovuoma.
Báikki nuora mielas logahaga buoremus bealli lea goittotge beassat vázzit skuvlla iežas ruoktobáikkis.
– Ieš in leat gal nu olu válljen daid meahccedáidogurssaid. Vuosttasveahkkegurssa válljejin, in nu beroš earás, muitala studeanta ja studeanttagotti njunušolmmoš Jani Ollila.
Logahat leamaš Suoma buoremusaid joavkkus
Eanodagas balle logi jagi dassái, ahte logahat nohká gielddas. Dalle hutke logahahkii ođđa nama ja ođđa oahppofálaldagaid.
Duottarlogahahkii vuosttas čavčča 2012 ohce vuosttas molsaeaktun dušše guhtta sudeantta, buohkat sis ledje báikegoddelaččat, vaikko dalle vurdege studeanttaid maid eará báikegottiin. Logahagas leat 30 álggahanbáikki.
Das fuolakeahttá logahat lea seilon Eanodagas ja lea dat beassan muhtin jagiin maid Suoma buoremusaid jovkui.
Hálddahuslašrektor Riitta Peltovuoma jáhkká, ahte logahatfálaldat bissu ain dás duohkoge gielddas.
– Gal mii sávvat, ahte min vuođđoskuvlii bohtet olles áigge oahppit, geat dasto jotket logahahkii. Dat lea min gielddas áidna nuppi dási oahppolágádus, dadjá Peltovuoma.
Beaivvi ságaid ja Yle Ođđasiid Sámis sáhtát maid guldalit Yle Areenas.
