Säämi máttááttâskuávdáš uárnee virtuaallâš kuursâid taan-uv kiiđâ já juávhust lii meid ohtâ aaibâs uđđâ kurssâ, mon iä lah ovdil ornim.
Majebaargâ 15.3. álgá anarâškielâ luuhâm- já čäällimkurssâ káidusin. Kurssâ lii tárguttum puohháid kiäh halijdeh šoddâđ ruokkâdub sämikielâ čällen, muštâl máttáátteijee Iida Kerokoski.
– Tot lii eehidkurssâ já álgá kuuđâ ääigi já nohá pel oovce ääigi. Oppâtijmeh láá Teamsist. Kurssâ pištá taan kiiđâ.
Kuursâst kalga mättiđ jo mottoom verd anarâškielâ já kuursâ máttááttâskielâ lii meid sämikielâ. Kuursâ ulmen lii, ete anarâškielân čälimist já luhâmist šadda uáppeid uási sii aargâ.
– Ulmen ličij, ete juáhháást ličij máhđulâšvuotâ čäälliđ čalluid, main lii ävkki sii ámáttist.
Uáppeeh meid loheh anarâškielâlijd kiirjijd já eres teevstâid kuursâ ääigi. Jyehi ohhoost kalga luuhâđ já čäälliđ peivikirje luhâmušâin.
"Ko kielâ ovdán, te šadda tárbu meid uážžuđ lase škovliittâsâid"
Virtuaalškoovlâst láá maaŋgâlágáneh škovliittâsah joođoost. Sist láá kuhebeh tavesämikielâ vuáđuškovliittâsah, moh älgih jyehi ive, já talle uánihub škovliittâsah, muštâl Säämi máttááttâskuávdáá virtuaalškoovlâ vuávájeijee Tiisu-Maria Näkkäläjärvi.
– Láá čäällim- já luuhâmškovliittâsah, luuhâmriggee já kieliteknologia škovliittâsah.
Näkkäläjärvi muštâl, ete sist lii máhđulâšvuotâ orniđ taan ive val eres-uv uánihis škovliittâsâid. Ulmen ličij algâttiđ nuorttâlâškielâ luuhâmriggee já luuhâm- já čäällimkuursâ, mutâ sij iä lah kavnâm máttáátteijee tai škovliittâsâi várás.
– Tom huámmáš, ete ko kielâ ovdán, te šadda tárbu meid uážžuđ lase škovliittâsâid. Puoh sämikielâin lii ereslágán tárbu, muštâl Näkkäläjärvi.
Korona keežild káidusin porgâm lii šoddâm ulmuid uápisin já Näkkäläjärvi arvâl, ete tast lii meid sijjân ävkki. Piergâseh láá ulmuid uáppáseh já nuuvt lii älkkeb uásálistiđ káiduskusrsáid.
Uuccâmäigi anarâškielâ luuhâm- já čäällimkuursân pištá taan máánu loopân räi. Kuursân väldih 5–15 uápped. Jis uáppeeh láá tuš muádis, te kurssâ ij äälgi.
Lasetäđuid kuursâst kaavnah Säämi máttááttâskuávdáá nettisijđost.
Kuldâl lase anarâš saavâid tääbbin.
