Sámeartista Ailu Valle beassá ávvudit guimmiinis iehčanasvuođabeaivvi presideantta šlohttii, go stuorát doalut ordnejuvvojit fas koronabottu maŋŋá maŋŋebárgga juovlamánu 6. beaivve. Valle ii leat leamaš doaluin ovdal, muhto joatkkafeasttaid tv-prográmmas son loaiddastii jagis 2017.
– Dihtoláhkái lean vuordán, ahte várra dat goas nu boahtá dat bovdehus, go presideanta Sauli Niinistö hástalii mu givssideami vuostásaš kampánjai, muitala Valle.
Valle iktá, ahte ii leat goaruhan ođđa gávtti aiddo dáid doaluid várás. Sus lea goit moadde jagi dassá gorrojuvvon gákti, man iluin coggá doaluide. Valle muitala maid, ahte su moarsi áigu čiŋadit muhtin sámečiŋaiguin.
– Lea dieđusge somá, ahte bovdejuvvo dohko, ahte várra lea juoidá goit bargan riekta, go dohko beassá, čaimmiha Valle.
Maiddái Sámedikki ságadoalli Tuomas Aslak Juuso lea bovdejuvvon ávvudoaluide. Son lea maid vuosttaš háve šloahtas.
Yle Sápmi ii leat fidnen dieđu eará šlohttii bovdejuvvon sápmelaččain.
Máŋgasat bovdejuvvon vuosttaš háve, virgebovdehusat eai nu olu
Bovdehusat leat čujuhuvvon dán háve eandalitge dearvvašvuođa- ja dorvvolašvuođasuorggi ámmátlaččaide. Virggiset geažil bovdejuvvon olbmot eai leat nu olu go dábálaččat. Ovdamearkka dihte Sámi oahpahusguovddáža rektor ii leat dán jagi oassálastimin doaluide.
Suoma presideantapárra lea bovden dán jagi iehčanasvuođabeaidoaluide oktiibuot 1 300 guossi. Dán háve bovdejuvvon gussiid mearri lea sullii goalmmádasa unnit go dábálaččat.
Presideantapárra ii bovden sođiid veteránaid iehčanasvuođadoaluide šlohttii, baicce sidjiide ordnejuvvui juo árat iežas deaivvadeapmi presideanttain.
Yle sádde njuolggosáddaga iehčanasvuođabeaivve diibmu 15 rájes
Yle sáddegoahtá iehčanasvuođabeaivve prográmma juo diibmu 15 rájes, go Yle TV1:žis ja Areenas álgá ovdasátta Kohti Linnan juhlia.
Šloahta doaluid Linnan juhlat -sátta álgá presideantapára jearahallamiin diibmu 18.50.
Gussiid vuostáiváldin álgá diibmu 19. Šloahta ávvudoalut leat Suomas okta eanemus gehččojuvvon prográmma jagis nubbái.
