Riikkabeaiválggaid evttohasaid namat leat dál dieđus.
Evttohasaid ruoktogielddaid geahčadettiin oaidná, ahte Ohcejogas leat guokte evttohasa: Ara Aikio (sos.dem.) ja Vesa Länsman (RÁB).
Anáris fas leat evttohassan Nina Niittyvuopio (kok.), Ida Lassila, Pyry Lätti ja Anna Roos (ruonát) sihke Rauli Kukkamaa (vs.) ja Lalli Mustakallio (gurut).
Soađegilis evttohassan leat álgán Satu Honkonen (sos.dem), Mari Penttinen ja Mika Riipi (guovddáš) sihke Krista Stauffer oktasašlisttus.
Lappi válgabires leat vihtta dálá riikkabeaiáirasa leat evttohassan: Katri Kulmuni ja Markus Lohi (guovddáš), Kaisa Juuso (vuođđosuopm.), Johanna Ojala-Niemelä (sos.dem.) ja Heikki Autto (kok.).
Riikkabeivviid guhkesáigásaš áirras Markus Mustajärvi (gurut) ii álgán šat evttohassan. Son lea ovddastan álbmoga davimuš válgabires 20 jagi. Mikko Kärnä (guovddáš) fas álggii evttohassan dál Helsset válgabires.
Go jienasteaddjit leat geahppánan, de maid áirraslohku geahppána
Evttohasaid lohku lea geahppánan logiin davimus válgabires. Evttohasat lea dál 112 go njeallje jagi dassá ledje 122. Maiddái bellodagaid ja oktasašlisttuid mearis leat Lappi válgabires nuppástusat jagi 2019 válgga ektui.
Stuorámus nuppástusat válgalisttuin leat das, go Paavo Väyrynen vuođđudan bellodat Seitsemän tähden liike ii leat válggas dál mielde, nu mo lei njeallje jagi dassá masá dievas listtuin. Ovddit válgga ektui leat Lappi válgabires jávkan vihtta earáge unnit bellodaga.
Álbmotlaš Kokoomus -bellodat lea válgalihtus dál dušše Suoma Kristtalašdemokráhtaiguin, nu ahte Suoma Ruoŧŧelaš Álbmotbellodaga okta evttohas ii gula dál máinnašuvvon bellodagaid válgalihttui.
Válgabiriid áirraslogut Suomas nannejuvvojedje golggotmánus 2022 dan mielde, man ollu válgabires ledje olbmot, geain lea jienastanvuoigatvuohta. Lappi válgabires dát lohku lei dál vuollái 160 000, go riikkabeaiválggain vel njeallje jagi dassá ledje sullii 1 300 jienasteaddji eanet.
Go áirraslohku geahppána čiežas guhttii, de okta ođđa áirras goittot loktana davimus válgabires riikkabeivviide, dahje juo Paavo Väyrynen. Sus lea goit hárjánupmi riikkabeaipolitihkas. Väyrynen lea fas evttohassan guovddáža listtus.
Válggas 2019 maŋimuš báikki fidnii guovddáš aidd’al de ruoná lihtu ovddabealde
Ovddit riikkabeaiválggas njeallje jagi dassá Suoma Guovddáš fidnii golbma áirasa Lappi válgabires. Veardidanloguin Ruoná lihttu lei dušše ovcci jiena duohken. Lea vejolaš, ahte báikki manaha dál guovddáš, muhto ovtta láhkai mii beare bellodagain sáhttá manahit báikkis.
Dievas nammalisttuid (14 evttohasa) leat ásahan dál Suoma Sosiálademokráhtalaš bellodat, Gurutlihttu, Suoma Guovddáš, Vuođđosuopmelaččat, Ruoná lihttu ja válgalihttu, mas leat Álbmotlaš Kokoomus ja Suoma Kristtalašdemokráhtat.
Suoma kommunisttalaš bellodagas lea dálge guhtta evttohasa ja Liike Nyt basttii ásahit dušše guokte evttohasa.
Ođđa listtut ovddit riikkabeaiválgga ektui leat bellodagaide čanatkeahtes oktasašlistu gávcciin evttohasain, Vapauden liitto ja Valta kuuluu kansalle guktot njeljiin evttohasain sihke Liberála bellodat guvttiin ja Avoin Puolue ovttain evttohasain.
