Guhkes ja váttis ohcamat leat dál nohkan. Uđđasa vuollái báhcán mánná lea gávdnon jápmán duorastaga. Máná gávdne muohtauđđasa vuolde ovdal gaskabeaivvi.
– Háliidan giitit buohkaid, geat leat oasálastán ohcamiidda, dadjá dutkama jođiheaddji, rihkuskomisára Kirsi Huhtamäki.
Maŋŋebárgga heahteguovddáš oaččui veahkkebivdaga, go Bállasduoddaris čuoigamin leamašan eadni ja mánná dáhtuiga veahki ja sáhtu eret duoddaris.
Dan maŋŋá sudnuide eai fidnen šat oktavuođa. Eatni gávdne jápmán maŋŋebárgga.
Ohcci: ”Hui hárve lean diekkár siivvus duoddaris leamašan”
Boazodoalli Miikka Sieppi oasálasttii maŋŋebárgga ohcamiidda ja muitala, ahte dalle lei issoras dálki. Son lea eret Kerässieppis, mii lea viehka lahka Bállasduoddara.
– Dat lei garra dálki. Garra biegga ja soica. Illá maidige oinnii. Hui hárve lean diekkár siivvus duoddaris leamašan, muittaša Sieppi.
Makkárge earenomáš muohtadilli doppe ii leat, goit boazodoallái. Leat skálvvit, častasat ja guovllat.
– Máŋggalágan muohta doppe lea. Dalle maŋŋebárgga gal lei issoras.
Heaŋggováriid dihte guovllus lea váttis johtit mohtorfievrruiguin
Guovlu, gos uđas manai, illá lea vuojehahtti mohtorfievrruiguin. Álkimus lea várra čilget makkár báikkis lea sáhka, go muitala mo doppe oba sáhttá bohccuid čohkket.
– Hui heaŋggovárit. Máŋgii ferte beatnagiid bidjat višahit ja geavahit helikoptera. Ii doppe juohke sadjái beasa njealjejuvllagiin, iige mohtorgielkkáinge, govvida Sieppi guovllu.
Bállasduoddara guovllus leat báikkit, gos uđas fierrá juohke jagi
Suoma birasguovddážis váruhit uđđasiin, eandaliige Bállasa guovllus. Dábálaččat uđđasa dagaha olmmoš jođedettiin duoddaris, muhto maiddái biegga váikkuha. Nu lei maŋŋebárgga Bállasduoddara guovllus. Muohtauđas, mii fierai, lei stuoris, dadjet birasguovddášis.
Earát, geain Yle Sápmi lea lonuhan moadde sáni, namuhit, ahte Bállasduoddara guovllus leat báikkit, gos uđas fierrá juohke jagi. Guovllus leat maiddái olu váralaš guovllat. Muđuige duoddarat leat máŋggaláganat allodatsojuidisguin, dadjet báikkálaš boazodoallit.
