Guoros viesuid ja stobuid láigohit dán áigge ollu Airbnb bokte, ja dainna dinejit maiddái Sámis.
Njuorggánlaš Hannu Holmbergii stobuid láigoheapmi lea šaddan olles beaivve bargun dan maŋŋá go fárrii ruovttoluotta iežas ruovttugildii Ohcejohkii.
– Ráffi várra lea dáppe dakkár, ahte dan olbmot háliidit boahtit deike vásihit. Goit Njuorggámis beassá duoddarii, ja Suomas dakkára ii leat vejolaš olahit maid dáppe sáhttá.
Etua-fitnodaga čielggadeami mielde jagis 2023 Ohcejogas ledje sámeguovllu divraseamos ja buoremusat buvttadan Airbnb idjadanbáikkit. Maiddái riikkadásis gielda birgii bures.
Anáris leat fas várren eanemusat Airbnb idjadanbáikkiid ja doppe ledje maiddái eanemus Airbnb idjadanbáikkit sámeguovllu gielddain.
Hannu Holmbergii Airbnb lea okta siidu, man bokte son láigoha stobuid. Airbnb bokte stobuid láigoheapmi lassána ja dat buktá sutnjege lasi barggu. Sus leat oktiibuot guhtta láigostobu.
– Dát lea hui fiinna guovllu, de maninba dan ii čalmmustahtášii ja dainna fidne vel barggu. Dat lea dás váldojurddan.
Holmberg barggai guhká fitnodatdoallin iežas huksenfitnodagas Norggas. Son oinnii ahte ruovttuguovllus leat buoret vejolašvuođat stobuid huksemii ja divodeapmái. Son lei árben áhčistis guovtte stobu Njuorggámis, de das lei buorre álgit.
Mátkkošteaddjit bohtet birra máilmmi. Holmberg muitala, ahte muhtumin leat boahtán gitta Aotearoas ja Perus. Dorvvolašvuođa geažil sii rávvejit buohkaide, mo geavahit dollasaji ja sávnni.
Son jáhkká, ahte okta sivva, manin airbnb-visttit leat divrasat, lea ahte daid ovdii ferte bargat olu. Loahppačorgen ja gávnnit gullet haddái, ja maid airbnb-siidu váldá iežas oasi dietnasis.
