Muhtimin sáhttá bárti geavvat hárjánange johttái ja veahki oažžun sáhttá leat váttis.
Anárlaš Aslak Uula Länsman lei gieskat boazomeahcis go geavai bárti. Son darvánii mohtorgielkkáin Leammi sisa iige beassan doppe šat eret.
Länsman lei jođus Márastahkii rátkimiidda go šattai mohtorgielkkáin muohtauđđasii. Ii das galle, muhto son gahčai vel gáldui go geahččalii beassat eret. Biktasat njuske ja dalle bárttis šattai vel váralut. Son iskkai riŋget heahteguovddážii, muhto telefon ii gullon.
– Riššát ja biktasat ledje čađa njuoskan ja šattai 30 gráđá buolaš. Mus ii lean eará go váldit gádjungokčasa, mii mus lei fárus ja mannat dan sisa ja doaivut, ahte olbmot goas nu álget váillahit ja ohcagoahtit mu.
Länsman gárttai vuordit veahki measta guokte jándora. Son geahččalii doallat iežas liekkasin dassážii go veahkki olle.
– Ledjen mun oalle oadjebas. Mus lei dakkár luohttámuš, ahte galhan mun lean dáppe juo badjel 40 diimmu leamašan ja dat álget ohcat, ahte gos dat lea vejolaš bártidan dat olmmoš.
Lihkus siidaguoimmit gádjo
Loahpas Länsmana gádjo eret iežas bálgosa eará boazodoallit. Okta guhte lei vuolgán ohcat ja gádjut su lei Iisko-Henrik Näkkäläjärvi.
– Badjel jándora maŋŋá bođii diehtu, ahte lea vuolgán gárddi lusa, muhto ii leat boahtán dohko goassige. Munnje bođii dalán jurdda, ahte dál ferte vuoddját ohcat, muittaša Näkkäläjärvi.
Ohcanjoavku guorragođii Länsmana luottaid. Näkkäläjärvi dadjá, ahte go sii ollejedje báikki ala, de lei jo beanta heahtedilli.
– Olmmoš lei galbmogoahtán, heahtihan das bođii. Lei idja ja heajos dálki, helikopter ii beassan dohko. Finai jorggiheamen nalde ja vulggii ruovttoluotta go ii beassan seaivut.
Ohcanjoavku fertiige hutkat eará ráđi mo fidnet Länsmana eret meahcis.
– Bijaimet plastitareaga ala ja gesiimet dainna guhkes báttiiguin dearpmi nalde. Čanaimet bolstariid ja pressuid sisa, ja liegga biktasiid sisa, muitala Iisko-Henrik Näkkäläjärvi gádjundoaimma.
Dasto álggii mátki biilaluotta ja ambulanssa lusa ja das buohccevissui. Veahkki lihkus bođii vel áiggil, smiehtada Näkkäläjärvi.
– Gal dan oinnii, ahte olmmoš lei galbmon. Ii livčče várra guhká gierdan šat. Buorre dovdu dál, ahte gávdnui almmái iige dađi gummet geavvan. Gearggaimet doarvái johtilit dohko.
”Lihkus ii lean mu áigi vel”
Aslak Uula Länsman lea giitevaš, ahte siidaguoimmit ollejedje su lusa.
– Lihkus ii lean mu áigi vel ja mu eallimis lea juogalágan mearkkašupmi, ahte cevzen ja olbmot bohte gádjut mu.
Länsmanis leat golbma máná ja su jurdagat finadedjege mánáin go beasai eret meahcis.
– Beasan vel deaivvadit ja buđaldit mánáiguin. Bearašhan dat lea deháleamos.
Son árvala, ahte earát eai livčče bastán su veahkehit go iežas siidaguoimmit.
– Dat lei nu hástaleaddji báiki, livčče leamaš váralaš eaktodáhtolaš buollingoddái dahje gili olbmuide vuolgit dohko. Doaivvošin, ahte olles servodat anášii árvvus boazodoalliid ámmátdáiddu johtit meahcis. Ja sis leat fievrrut, maiguin doppe birge.
