Eanodaga gielda lea das hárvenaš gielda, ahte dat oamásta girdingietti. Borgemánus Heahtá girdingietti girdilangeainnu bajildusa ođasmahttet. Dat máksá badjel vihtta miljovnna euro.
– Dáinnalágin mii oažžut girdigieddái 15–20 jagi lasi geavahanáiggi, muitala girdingietti jođiheaddji Marko Halla.
Eanodaga gieldda ulbmilin lea lasihit guovllu geasseturisma. Ođđa bajildusa mielde gieddái sáhttet seaivut stuorra girdit maiddái geasseáigge.
– Dálá dilis dat ii gierdda geassit lossa girdinmašiinnaid, lasiha Halla.
Njukčamánus girdingieddi lei mielde Nato Nordic Response 24 -soahtehárjehusas. Giettis johte čuođit soahtefievrrut. Boahtteáiggis fievrruide lea ain buoret sajit.
– Muhtun girdinmašiinnat eai gierdda sáttuid ja geđggiid. Ođđa bajildus gokčá daid ja dan maŋŋá soahtefievrruin sáhttá seaivutt dohko, dadjá Halla.
Girdingietti doarjun doalvu stuorra oasi gieldda bušeahttas
Eanodat oaččui girdingietti ođđa bajildussii doarjaga Lappi lihtus ja bargo- ja ealáhusministeriijas oktiibuot 5 miljovnna euro. Go fitnu golut lassánedje, gárttai gielda juolludit prošektii vel sullii 314 000 euro.
Girdingietti doaimmat leat ságastahttán gielddas dan rájes, go gielda ostii girdingietti alcces.
– Muhtumat jurddášit, ahte iežas girdigieddi lea hui dárbbašlaš ja fiinna ášši. Muhtumat fas vásihit, ahte das ii leat ávki gielddalaččaide. Sii oidnet, ahte girdingieddi lea dušše badjelmearalaš gollu gieldda ekonomiijas, dadjá gielddaráđđehusa ságadoalli Jarmo Näkkäläjärvi.
Vássán jagiid áigge gielda lea dorjon girdingietti doaimmaid 150 000-250 000 euroin jagis, go mátkkosteaddjimearit eai leat gokčan gietti goluid.
Gieldda bušeahtta lea gávcci miljovnna euro.
– Galhan dat lea proseanttain hui stuorra lohku. Jos dat lea ain boahtteáiggisge dan sullásaš, nu gal gielddas leat oalle čavga áiggit, jáhkká Näkkäläjärvi.
Mátkkošteaddjiid mearit lassánan
Girdingietti jođiheaddji Marko Halla goit luohttá boahttevuhtii. Su mielde girdingietti mátkkošteaddjimearit leat lassánan jahkásaččat sullii logiin proseanttain.
– Boahttevaš sesoŋŋa lea seammálágan. Mii viggat guhkidit sesoŋŋa, vai dáppe livčče mátkkosteaddjit maiddái ruškki áigge ja giđđačugŋuid áigge.
Mannan jagi Eanodaga gietti mátkkosteaddjimearri lei measta 33 000 olbmo.
