Yhtysvalloin prezidentakse pyrgii republikuanupuolovehen Donald Trump on organizuinnuh kampuanientembavuksen McDonald's-ruttosyömisrestoranas Pennsylvanias mennyt pyhänpiän. Kameroin ies Trump žuarii restoranas puikkokartohkua da taričči rahvahale syöndyveruo autokioskan ikkunazespäi. Häi sežo vastaili ikkunazespäi pihal olijoin toimittajien kyzymyksih.
Restoran oli salvas da aloveh aijattu tembavuksen aijakse.
The Washington Post -lehten mugah peitolline palvelu tarkasti Trumpan vastuajat ristikanzat edukyndeh. Hyö ei piästy tiluamah iče, ga suadih Trumpaspäi ilmastu da piävyndähisty syömisty.
Tembavuksen tarkoituksennu oli riäzittiä demokruattupuolovehen vastuehoitettuu Kamala Harrisua, kudai oli sanelluh, gu opastundan aigua häi oli kezäruavos McDonald'sas. Trumpan kampuanien mugah Harris buitegu olis kielastelluh kogo dielos.
– Nygöi olen ruadanuh McDonald'sas. Olen ruadanuh 15 minuuttua hätkem, migu Kamala. Häi nikonzu ei ole ruadanuh tiä, taratti Trump ruttosyömisrestoranas.
Faktoi tarkistajan Snopes-sivuston mugah Harrisan kezäruadoh näh hamburgerurestoranas ei ole tovestehtu ni čurah, ni toizeh.
Yhteltiedy Trump piäzi kiändymäh tärgieh iänestäjien joukkoh libo ruadoniekkoih, kudamil puikkokartohkua žuarii prezidentakse pyrgii oli kui hyö iče.
Toven sanuo, Trump on ruadanuh kogo eloksen omassah perehen kiindehistöbiznesas da myöhembä aijanviettoalal sego poliitiekas.
Trump meni töihin hampurilaisravintolaan – tarkoitus vinoilla Harrisille
