Narkotihkaid geavaheapmi lea lassánan davimus Lappis guhkkit áigodagas, muhto dilli ii leat dramáhtalaččat nuppástuvvan, muitala Lappi bolesa rihkuskomissára Tuomo Seikkula.
– Almmolaččat sáhttá dadjat, ahte Davvi-Lappi narkotihkadillái váikkuha turismma lassáneapmi. Guvlui bohtet olu sesoŋŋabargit ja váidalahtti sin joavkkus leat maiddái narkotihkaid geavaheaddjit ja vuovdit. Turistat maid váikkuhit dasa, ahte narkotihkaide lea jearalmas, muitala Seikkula.
Lappi buresveadjinguovlu rabai dán vahkus Avvila dearvvasvuođaguovddážii náluid lonuhanbáikki, gos geavaheaddjit sáhttet lonuhit čuggenbiergasiid.
Lonuhanbáikkis sáhttá galledit anonyman, muitala dearvvašvuođa ovddideami koordináhtor Minna Lehtoväre.
– Min ulbmilin lea, ahte dáid lonuhanbáikkiid vehkiin eastit njoammudávddaid leavvamis. Go geavaheaddjiide leat buhtes biergasat, de dávddat eai beasa leavvat. Vuolggasadji lea, ahte ná sáhttit eastit jápmimiid, mat laktásit narkotihkaid geavaheapmái, muitala Lehtoväre.
Sullasaš bálvalus maiddái Anára girkosiidii ja Ohcejohkii?
Lappi buresveadjinguovllus leat dál náluid lonuhanbáikkit Giemas, Durdnosis, Roavvenjárggas, Soađegilis ja Giemajávrris. Lágas mearriduvvon bálvalusa hálidit buresveadjinguovllus ovddidit dohko, gos dasa lea dárbu.
Avvila lonuhanbáiki leamaš rabas dán vahku rájes. Dat bálvala juohke maŋŋebárgga diibmu 14.30–15.00.
Dál go Avvilis lea álgán náluid lonuhanbálvalus, de buresveadjinguovlu smiehttagoahtá, ahte galggašiigo sullasaš bálvalusa ovddidit maiddái Anára girkosiidii ja Ohcejohkii.
Nárkomirkkuid vuvdet neahtas – maiddái doaresbeale guovlluide
Rihkuskomissára Tuomo Seikkula dieđu mielde Lappis geavahit eanemus kannabis, muhto maiddái amfetamiinna ja ekstása. Narkotihkaid vuvdet dán áigge neahtas, iešguđetlágan gulahallanlávddiin ja sosiála medias, dadjá Seikkula.
– Narkotihkagávpi lea sirdásan nehttii ja gulahallanapplikašuvnnaide. Maiddái boahtte áiggis lea vuordimis, ahte dat bissot doppe. Oktavuođat geavaheaddjiid ja vuovdiid gaskkas leat maid boaittobealguovlluin.
Yle dagai gieskat viiddis artihkkala Roavenjárgga nárkomirkogávppis, mii doaibmá neahtas. Doppe oastit jearahit narkotihkaid čuoiganguovddážiide, eandaliige Levii, Suoločielgái ja Rukai. Neahttagávppis leat logit sierra smávva vuovdinkanálat Lappi smávva gielddaidege.
