Vaikko Anára girkosiidda skuvlla boares ásodatvisti divvojuvvui 2000-logu bealde, dan galgá dál gaikkodit. Vistti vuođu guohpa dagahii fuones sisáimmu, iige doppe sáhte šat orrut.
Jagis 1965 huksejuvvon visti jávká čavčča áigge. Seamma guvlui huksejuvvo ođđa skuvla.
– Ásodatvistti sadjái boahtá vejolaččat oassi ođđa skuvlavisttis, muitala giddodathoavda Jaakko Korppila.
Visttis leat maŋimuš jagiid doaibman earret eará nuoraidlatnja, álšasále ja skuvlagievkkan.
Anára skuvlla giddodagain leamaš jahkeviissáid sisáibmováttisvuođat, main ovdamearkka dihte skuvlamánáid váhnemat leat galgan váidit máŋgii.
Anára gieldda váldostivra mearridii juovlamánus huksehit Anára girkosiidii ođđa skuvlla. Olles skuvlafidnu árvalit máksit eanemusat sullii 9,7 miljon euro. Fidnu ollašuvvo jagiid 2022–2024 áigge ja ođđa skuvla galggašii gárvánit jagis 2024.
Beaivvi ságaid ja Yle Ođđasiid Sámis sáhtát maid guldalit Yle Areenas.
