Ohcejohkalaš Leena Niittyvuopio-Jämsä lea maŋimuš vahku áigge mannan čađa máŋggalágan dovdduid. Ođđa sámediggelága gopmáneapmi riikkabeivviid vuođđoláhkaváljagottis lea boktán olu dovdduid áibbas su árgabeaieallimis.
Vuosttaš dovdu lei heahpat, son muitala.
– Mun heahpanan, ahte gádden dál dat manná čađa. Ja dasto mun vehá suhtten. Eandalit go áddejin dan Lappi riikabeaiáirasiid skelbmošeami doppe lávdegottis, de das bođii diet duođai suhttu, Niittyvuopio-Jämsä govvida dovdduidis.
- Loga lasi: Sámediggeláhka bisánii politihkalaš vuostálastimii – láhkaevttohusas eai lean vuođđolágalaš čuolmmat
Niittyvuopio-Jämsä goittot vuordá, ahte ođđa sámediggeláhka boahttevuođas oaččošii doarjaga riikabeivviin ja boađášii fápmui viimmat guhkes dáistaleami maŋŋá. Son atná dan hirbmat dehálažžan, leahan sáhka olmmošvuoigatvuođain.
– Galhan das lea sáhka min olmmošvuoigatvuođain, das ahte Sámediggi ja sápmelaččat ožžot ieža meroštallat, ahte geat min giela ja kultuvrra áššiin mearridit, jurddahallá son.
Buorrin beallin dieđu lassáneapmi
Sámeáššiid ovdáneapmi livčče lean meastaba imaš sihke Esko Aikio ja Veikko Holmberg mielas. Soai leaba máŋgii oaidnán dan, mo jagis nubbái sámeáššit badjelgehččojuvvojit riikkadási politihkas. Ohcejohkalaš guoktá jáhkkiba goit, ahte dilli lea mannamin buoret guvlui vehážiid mielde.
Esko Aikio ii oba vuordán sámediggelága mannat čađa riikkabeivviin. Seammalágán jurdagiiguin son lea earáge sámeáššiid ovdáneamis, dego davviriikkalaš sámekonvenšuvnna ráhkadeami ja ILO-soahpamuša ratifierema ektui Suomas.
– Mun lean oppa áigge jurddašan ja hállange maŋisboahttiide, ahte eai dáidde mu eallinagis gal diet áššit ollašuvvat. Dát báhcá didjiide árbin dalle, dadjá Aikio.
Vaikko beahttašupmi báitáge olbmuid vástádusain ja bellodatspeallu sámediggelága buohta váivašuhttá, leat goittot muhtin áššit rievdán.
Veikko Holmberg árvala, ahte dál goittot diehtu lea lassánan oluge váldoservodagas.
– Ja várra dat olbmot, geat dal leat ovddidan daid áššiid, de jos dat jotket seamma láhkái, de mun gal jáhkán dalle boahtá juoga buorre, Holmberg smiehttá.
