Heahtá čierastallanbáikki, Hetan Hiihtomaa rahpan lea dán dálvvi gillán máŋgga vuorddekeahtes váttisvuođas. Báikki eai leat vel ollenge beassan rahpat dán dálvái.
Vuos čuoigganguovddáš leamašan gitta, go doppe leat dahkan divvunbargguid, mat guske bargiid dorvvolašvuhtii. Dasto ii lean doarvái muohta. Dálges šalkenmašiidna leabbá jávrri botnis.
Muohttaga šalkenmašiidna doddjui jieŋaide go ledje vuodjimin čuoiganláhttu Ovnnesjávrri jieŋa ala. Dáhpáhusbáiki lea Aittamaalahdentie guovllus, moadde kilomehtera geažes giliguovddážis.
Gielda viggá dál ordnet nuppi šalkenmašiinna sadjái ja rahpat čierastallanbáikki juogo dán vahku loahpas dahje boahtte vahkus. Gielda maiddái ferte jiekŋudit geainnu jieŋa ala vai bastet loktet mašiinna eret. Olbmuid bivdet johtit várrugasat dien guovllus, mii lea moadde kilomehtera gilis oarjjás.
Asehut jieŋat go dábálaččat
Suoma birasguovddáža dieđuid mielde jiekŋagovččas lea 5-10 sentte ásehut go dábálaččat dán muttus. Sámis guovvamánu maŋimuš beaivvi mihtidemiin jieŋa assodat leai mehterbealis gitta 76 sentii.
Anára Njellimis ja Ohcejoga Geavus jieŋa assodat lea justa mehterbealli. Ovnnesjávrris Eanodagas 54 sentte ja Gilbbesjávrris 76 sentte.
Báikegottiid gaskkas goit sáhttet leat stuorrage erohusat ja erenomážit rávdnjebáikkiid jieŋaide ii gánnit nu luohttit. Báikkuid lea maid čáhci jieŋa alde.
