Ucjuuvâ Farrenkiäinust lii lamaš tullâsaajeest šoddâm meccipyellim, muštâl Aanaar já Ucjuuvâ kuávlu puálumiäštár Jukka Harmanen.
Ucjuuvâst pasepeeivi suulân tijme 16 uáinistii suovâ já Njuárgám piäluštemohtâdâh uusâi pyellimsaje. Vala vuossaargâ koskâpeeivi meccipyellim puolij. Jo talle tiettii, ete mecci lii puállám suulân 20 hehtaarid. Tuoddârist meccipyellim leevvân älkkeht, ucemus-uv piegâst.
Meiddei Aŋŋelist mecci lâi puállám vástuppeeivi jonsahpeeivi ááptu suulân 2,5 hehtaar. Meccipyellim suijân arvâleh aldâgâs.
Sehe Aanaar ete Ucjuuvâ kuávlui meccipyelimij časkâttem iššeen kevttii helikopterijd, ko pyelimij kuuvl ij lamaš älkkee peessâđ.
Maid toohâđ jis huámmáš meccipyellim?
Jis huámmáš suovâ teikkâ tuulâ, te puálumiäštár Jukka Harmanen rävvee vuossâmužžân suáittiđ 112-etinumerân. Jis lii máhđulâš já torvolâš, te sajaduv já tábáhtus puáhtá visásmittiđ já jieš keččâliđ časkâttiđ.
Ilmatieteenlaitos.fi siijđost puáhtá tärhistiđ lii-uv meccipyellimváruttâs vyeimist. Koškesvuođâ keežild meccipyellimvaarâ lii styeres já eromâšávt pieggiis šooŋâst tullâ leevvân älkkeht. Taan ohhoost meccipyellimváruttâs lii vyeimist vijđáht Tave-Suomâst.
