Gáregasnjárgga K-gávppis álggaha ođđa gávpejassan Hans-Niiles Tapiola. Áibbas ođđa almmái Tapiola ii leat Gáregasnjárggas. Son lea bargan jo jagi Gáregasnjárgga gávppis, ovttas dálá gávpejas Seppo Härkösiin.
Kesko-dieđáhusas Tapiola muitala mo son vuordá beassat ovddidit gávppi ovttas bargiiguin.
– Dál dego máhcan máttuidan guvlui. Áhkkorohkki lei Gáregasnjárggas bajásšaddan ja mus leat fuolkkit goappatbealde rájá, muitala Tapiola.
Gávpejasa bargu leamašan Tapiolai oahpis, go áhččis Uula Tapiola lea Ohcejoga márkánis bargan gávpejassan guhká. Seamma ámmátsuorgi geasuhii Hans-Niiles Tapiola maiddái, go vejolašvuohta dasa rahpasii.
– Dathan boahtá doppe sogas ja mun lean gávppiin bargan hui olu. Muhtumin leamašan maid eret studeremin, muhto álo lean boahtán fas bargui. Dasa lea mo nu šaddan ja dat álggii dovdot dakkár hommán, ahte ieš liikon, dadjá Tapiola.
Gávpejasa bargu lea Tapiola mielas hui sosiálalaš ja juohke beaivi lea earálágan. Unnit báikegottis olbmot šaddet oahpisin.
– Dás oaidná olbmuid ja álo gullá, mii gullo ja mii dáhpáhuvvá. Dat gal lea somá, muitala Tapiola.
Dáláš ja dovddus gávpejas Seppo Härkönen lea guhká ohcan olbmo, geasa vuovdit eallinbarggus. Dál dat dáhpáhuvvá, muhto son ii gal nuola oalát gávpealbmá gistáid.
– In leat guođđimin oastiid. Manan buriin mielain iežan ruovdegávpáiges bargui, muitala Härkönen Kesko dieđáhusas.
