Otne bearjadaga lea vuolláičállon Deanu ođđa guolástannjuolggadus, muitalit eana- ja meahccedoalloministeriija dieđáhusas. Dat sisttisdoallá guolástusráddjehusaid, mainna geahččalit suodjalit Deanu luossanáli.
Heajos luossanáli dihte luossabivdui evttohit ráddjehusaid cehkiid mielde sihke luossanáli nannosmuvvama ja guliid goargŋunáiggiid mielde. Guolástusnjuolggadusas leat maid kriterat dasa, mo luossabivddu ráddjehusaid ložžejit dađi mielde go luossanálli nanosmuvvá. Lassin eará guliid bivddu leat dahkan álkkibun.
Njuolggadusevttohus lei geassit cealkinláhkai ja dasa dahkkojuvvojedje vel nuppástusat čavčča áigge. Njuolggadussii lea dál ovdamearkka dihte lokten ahkeráji 18-jahkásaččaid rádjái mánáide dárkkuhuvvon guolástuslobiin. Ruoššaluosa oažžu bivdit almmá sierra bivdofidnu haga eará guollešlájaid bivddu oktavuođas firpmiin ja stákkuin dasa čujuhuvvon báikkiin.
Ráđđehusa evttohusas leat maid rievdadusat Deanu guolástansoahpamuša fápmuibidjanláhkii. Ráđđehusa evttohus lea dál cealkinláhkai ođđajagimánu 15. beaivve rádjai. Deanu guolástannjuolggádus ovdána de riikkabeivviid gieđahallamii.
Deanu luosa goargŋunmearit ledje ain vuollin mannan gease. Dárkilot raportta Deanu luossanáliid dilis boahtá lagaš áiggiin ja dan almmuhit luondduriggodatguovddáža neahttasiidduin.
