Eamiálbmogiid filbmafestivála Skábmagovat bálkkašii filbmadahkki Suvi West Skábmagovat-bálkkašumiin.
Festivála háliida čalmmustahttit dainna bálkkašumiin West mihttilmas filbmakarriera ja dan, mo son lea lokten ovdan máŋggaid fáttáid, mat guoskkahit sámi servoša.
– Suvis lea viiddes dáidu ja máhttu filbmabuvttadeami iešguđet osiin, muhto sus lea erenomáš dáidu suokkardallat, guoskkahit ja muitalit duohtavuođa, muitalit festiválaorganisašuvnnas.
Westis alddis illá gávdnojedje sánit bálkkašumi oažžuma maŋŋá. Bálkkašupmi geigejuvvui sutnje Máhccan-filmma čájeaheami maŋŋá.
Suvi Westii lea hui dehálaš, ahte eará sápmelaččat atnet arvvus su barggu.
– Lea vehá váttis muitalit makkár dovddut dál leat, daningo leat olu dovddut. Dat ii leat dušše dat bálkkašupmi ja gudni, muhto das lea nu ollu duogábealde dohkkeheapmi ja ráhkisvuohta. Dat symbola lea olu stuorát go dat bálkkašupmi, man lasihat CV:i, lohká West.
Suvi West bagadan filbma Máhccan lea maiddái evttohassan jagi dokumeanttan Suoma dehálamos filbmabálkkašupmái, Jussii.
Skábmagovat-bálkkašumi leat ovdal ožžon earret eará Elle-Máijá Tailfeathers, Katja Gauriloff, Inger-Mari Aikio, Iskku Ovllá nappo Oula Näkkäläjärvi, Liisa Holmberg ja Nils Gaup.
