Obb maaiʹlm kuâsttji jeeʹresnallšee ʹmen kroota, ko Harju piârrja šõõddi siõmâž. Šõddâm mâŋŋa leäi äiʹǧǧ siõmmnai siõmmnai harjjned jiijjâs jieʹnn rooʹle.
Jieʹnnvuõtt ij kuuitâǥ leämmaž aalǥ rääʹjest nåkkam mâʹte leäi veâl vueʹrddempââʹj ääiʹj jorddam. Mõʹnt ij ni ǩii mainstam, mõõn vaiggâd tõt vuäitt še leeʹd, smeâtt ââʹn 7-âkksaž škooulpääʹrn jeäʹnn Terhi Harju.
– Jiõm leʹčče aʹrvvääm, mõõn jiânnai jieʹllem mottai ommǥa šõddâm mâŋŋa. Ij vueiʹt liikkeed seämmanalla ko teʹl, ko leäi siõʹme vuâstta. Kråʹpp mottai nuʹtt jiânnai tõn ääiʹj, moštt Harju.
Jeäʹnnen paaʹʒʒi ođđ aaʹššivuiʹm määŋg vuâra õhttu da tõõzz leʹčči taarbšam jeänab tuärj.
Kõõččmõõžž päärnai haʹŋǩǩummšest puʹhtte mieʹldez peʹccel
Håʹt-i puärrsid da jeäʹrben jieʹnnid, kook lie siõʹme vuâstta, lie jiânnai vuäppõõzz da ǩeeʹrj ommǥai hoiʹddjummšest di päärnai šõddmõõžžâst, lij jeäʹnnen šõddmõš aivv jeeʹresnallšem, vuäinn Harju.
Harju leäi valmštõõttâm nuʹtt ommǥa šõddummša ko še uʹcc päärnai piârjieʹllma. Ääʹšš jie kuuitâǥ mõõnnâm aivv mâʹte ǩiiʹrjin leʹjje mainstam.
– Muʹst leäi čuuʹt vaiʹǧǧes šõddummuš teʹl da muʹnne šõõddi nåkkam toobd, što jiõm haaʹled tõn tuejjeed teänab. Õhtt päärnaž lij nokk, smeâtt Harju.
Mii heâmmad jiânnai nuõrr jieʹnn da mâʹst õutstõõzzâst jeät sarnnu jiõnnsa, lij tõt, mäʹhtt piârrjid kuõskki privattääʹšš lie oummid friijj saǥstõõllâd. Tâʹlles, ko Harju leäi siõʹme vuâstta, son vuäǯǯai kuvddled jiânnai kommeeʹntid tõʹst, što âlgg nuuʹbb päärna rajškueʹtted.
Harju miõlâst, näkkam ääʹrjes aaʹššin mõõnât määŋg vuâra suåvlažvuõđ pâʹjjel, jie-ǥa oummu ââʹn ciistâst puärrsi jurddjid. Piâr da päärnai haʹŋǩǩummuš lij puki oummui jiijjâz äʹšš.
– Vaiʹǧǧes šõddummuš nâânii tõn tuʹmmstõõǥǥ, koon leʹjjem juʹn ouddǩiõʹtte tuejjääm, što jiõm haaʹleʹče ko pâi õõut päärna. Tõt, ko feʹrttji pâi särnnad oummid, što ij puäʹđ nuʹbb päärnaž, de muʹnne šõõddi juʹn peʹccel tõʹst, ko õõlǥi pâi särnnad ääʹššest, mušttal Harju.
Ääʹrjes tobddmõõžž ǩiõlâst
Ko Terhi Harju leäi siõʹme vuâstta, son leäi tuʹmmjam juʹn teʹl, što son äigg seʹrdded vaarvuâlaž sääʹmǩiõl uʹcc päärnže. Jeeʹres oummin Harju vuäǯǯai jiânnai õõmšummuž tõʹst, mõʹnt âlgg päärnže mainsted ǩiõl, koon iʹlla jiõčč mainstam jieʹnnǩiõllân.
Näkkam saaǥǥ vaaikte tõõzz, mõʹnt vuõssmõs määnpõõʹji ääiʹj Harju ij tuõsttâm mainsted säämas jiijjâs päärnže ko tåʹlǩ dååma. Harju ij leämmaž valmštõõttâm jeäʹnnen tõõzz, što ǩiõl jeälltummuš vuäitt kaggâd pââjas nåkkam tobddmõõžžid še.
– Lij leämmaž vaiggâd kâʹl mättješkueʹtted leʹbe mättjed smiõttâd tõn ääʹšš tõnnalla, što säämas mainstummuš iʹlla puästtad. Tõt lij teäddam muu jiânnai, mušttal Harju.
Ko ǩiõl lij õʹhttešt mõõntam, šâʹdde Harjust hieʹlǩeld kõrr tobddmõõžž, što päärnaž âlgg pâi kuullâd sääʹmǩiõl da lääddas ij vueiʹt mainsted.
Čougg jurddi lie kuuitâǥ lueʹǯǯjam siõmmnai siõmmnai. Škooulâkksaž päärnaž maainast lääddas, håʹt-i jeäʹnn maainâst suʹnne säämas.
– Ij-han tõt muđoi vueʹlj muʹtted tõn vueʹjj, jõs ij jiõčč joorât tõn ǩiõl mõõntem nuuʹbbiooʹri. Mäʹhtt-ne tõt kuuitâǥ lij nuʹtt, što päärna pâi mainste lääddas. Lääʹddǩiõll vuäitt. Tuäivam, što meeʹst leʹčči puõʹttiääiʹj sääʹmǩiõlâst nåkkam pirrõs, što päärna vuäǯǯa mainsted säämas kõskkneez, smeâtt Harju.
