11 eeʹǩǩed mââiårra Kia Olin tuʹmmji mättõõllâd sääʹmǩiõl da siirdčõõđi Nurmijärvist Aanra. Son haaʹlii mainsted da fiʹttjed sääʹmvuuʹd jiijjâs ǩiõlid. Iiʹjji mieʹldd son mättõõli vuõššân tâʹvvsääʹmǩiõl da mâŋŋa uuʹccab nuõrttsääʹmǩiõl.
Ǩiõllkuursid spraavdõõđeen son ij leʹčče åskkam, što måtam peeiʹv son mättat sääʹmǩiõl še jeärrsid.
– Tät pâi mõõni nääiʹt, jiõm mon tän ni kuäʹss tuʹmmjam, mušttal Olin da pååǥǥast.
Mättʼtõõttjen nuʹtt škooulneeʹǩǩ ko vuõrâsoummu
Jeeʹres ǩiõl lie pâi ǩeässam Kia Oliin miõl, da suʹnne sääʹmǩiõl mättʼtõõzzâst šõõddi samai vääžnai. Son lij ââʹn mueʹdd eeʹjj ääiʹj mättʼtam sääʹmǩiõl ougglõsmättʼtõõzzâst.
Uccjooǥǥ kååʹdd da Sääʹmteeʹǧǧ sääʹmǩiõli ougglõsmättʼtõshaʹŋǩǩõõzzâst lie õhttsiʹžže 180 škooulneʹǩǩed, koin 25 mättʼtâʹtte nuõrttsääʹmǩiõl. Oliin lââʹssen haʹŋǩǩõõzzâst lij še nuʹbb vueʹssäiggsaž sääʹmǩiõl uʹčteeʹl.
Olin mättat še Sääʹm škooultemkõõskõõzz virtuaalškooulâst kueʹhtt joouk. Toʹben še sääʹmǩiõl kuurs lie peäglva. Sääʹmǩiõl vuâđđkuʹrsse oʹcce 49 ooccjed. Seeʹst õhttsa 28 lie ââʹn mieʹldd kuursâst.
Olin mättat jiijjâs ǩeʹttempõõrt påʹrddpeällsest kurssniiʹǩǩid pirr Lääʹddjânnam.
– Tõt leäi vuõss vuâra põõlteei. Jiõm teâttam ni vooʹps, mâid leäm tuejjeʹmmen. Pâi âlgg altteed da jiõčč mieʹrreed, mâid mättʼtam, mušttal Olin.
Mueʹdd eeʹjj seʹst son kuuitâǥ harjjni ođđ tuõjju. Olin vuäinn, što son vuäitt jiijjâs ouddmiârkin čuäʹjted, što sääʹmǩiõl mättjem lij vueiʹtlvaž veâl 40-ekksiʹžžen.
– Jiõčč vuäitam mainsted tõʹst, što leäm vitt eeʹjj mââiårra looǥǥškuättam sääʹmǩiõl. Jiõm ni mon teâttam, mäʹhtt tõt mâânn, leâša tõn lij kuuitâǥ vueiʹtlvaž mättjed, särnn Olin.
Ǩiõllnueʹđđ lij pukid jõnn tobddmõš
Škooulniiʹǩǩin sääʹmǩiõll lij jieʹnnǩiõll leʹbe sooǥǥ ǩiõll. Vuõrâsoummuin määŋgas jeäʹla mättjam sooǥǥâz ǩiõl leʹbe haaʹlee tuärjjeed päärneez sääʹmǩiõl määttain, mušttal Kia Olin.
Ko sääʹmǩiõl mättââll, tõõzz õhttâʹvve še jiânnai jõnn tobddmõõžž.
– Tät sätt leeʹd vaiggâd da täʹst lij vääžnai saǥstõõllâd. Leäm kuullâm, što määŋgas särnna, što leäi leeʹd hiâlpab mättjed nuuʹbb ǩiõl ko sääʹmǩiõl, mušttal Olin.
Uʹčteeʹlen suʹst feʹrttai fiʹttjed saaʹmi ǩiõllnuäʹđ. Oliinâst lij tõõzz neävv, mäʹhtt saǥstõõllâd õõutsââʹjest vaiʹǧǧes tobddmõõžžin. Olin laaʹvai särnnad mättʼtõõđjid, što ǩiõl mõõntummuš lij samai takai maainâs da sij jie leäkku õhttu aaʹššin.
– Ååskam, što sätt leeʹd šiõǥǥ še vueiʹnned jeärrsid, kook lie seämma vueʹjjest, särnn Olin.
Oliin miõlâst ǩiõlljeälltummuš ij leäkku ni kuäʹss leämmaž pâi õõut oummust leʹbe õõut piârrjest ǩidd.
– Tõt lij šuurab äʹšš da lij vääžnai vueiʹnned tõn, mušttal Olin.
Suu miõlâst pukin šuurmõs läuʹǩǩ lij juʹn valddum, ko mättʼtõõđi lie juʹn puättam kuʹrsse, lie valmmâž tuejjeed tuâj tän ǩiõl ouʹdde da väʹldde ǩiõl mååust jiijjâz jieʹllma.
– Tõt lij miâlggâd jiânnai, mâid sij lie juʹn tuejjääm da lie tääiʹben ââʹn.
