Dál lea njeallje jagi das go gollerogganmášenat bággejuvvojedje eret Leammis. Das rájes lea goittotge mášeniid ráhta ja skálla beare badjánan Vuohču guovllus.
Fámus leahkki gollerogganlobit Vuohču guovllus leat dál njeallje geardde eanet go njeallje jagi dassái.
Dorvvolašvuođa- ja kemikáladoiammahat Tukes allagohcci Sami Mantere oaivvilda goittotge, ahte Leammi roggit eai leat sirašuvvan Vuhččui, baicce dat leat eará roggit geat leat dohko guivásan.
– Ohcamušat doppe gal leat juoga nu veardde, muhto mii mu vásáhus das lea, de Leammi golleroggit eai sirdašuvvan álgage Vuohču guvlui, muitala Mantere.
Mantere deadduha ahte sii gal čuvvot ruvkelága ja gulahallet Sámedikkiin, ejb-guovddážiin, Meahciráđđehusain ja guovllu eanangoddemuseain go mieđihit lobiid.
Báikkálaččat leat goittotge fuolas go gollerogganmášenat leat laskan meahci suohkatvuhtii. Dál Vuohču Sámiid Searvi lea álggahan Šelgos Tankajohka prošeavtta, man ulbmilin lea čalmmustahttit guvlui čuohcci mášiinnalaš golleroggama áitaga.
– Dan sáhtán dadjat, ahte maŋimuš jagiid áigge lea golleroggan lassánan dáppe Vuohču guovllus. Maŋgasat leat maiddái sirdašuvvan mášenroggamii, dadjá Vuohču Sámiid Searvvi stivrralahttu Milla Pulska
Prošeavtta spihččestedje almmolaččat johtui mannan bearjadaga, go luite Tankajoga vulos Burdnomohkis gitta Mella gáddái. Ulbmilin lei buktit ovdan Tankajoga mearkkašumi Vuohču guovllu sámiide, dego dan, makkár oktavuohta jogain lea leamaš ovdal dahkujávrriid ja mot stuora birasnuppástusat rievdadedje dan.
Dahkujávrrit baldán luosa don čieža čážiide
Ii leat dušše ruvkeindustriija, mii lea čuohcán guovllu čázádagaide. Pulska muitala, ahte maiddái dahkujávrriid huksen vuhtto ain otná beaivve Tankajogas.
– Ovdamearkka dihte ovdal dahkujávrriid mis lea leamaš luossage Tankajogas, ja dat gal lea dál jávkan. Muđuige leat lassánan dakkár ruskaguolit Tankajogas, go buot min čázit leat oktavuođas dahkujávrriide, nu dat lea rievdan ollásit, muitala Pulska.
Pulska mielas eiseválddit eai váldde báikkálaččaid oainnuid vuhtii mearrádusain mat gusket buot eanemustá justa sin.
– Mii sáhttit gal cealkit, muhto dat eai jur váldde báikkálaš olbmuid oainnuid vuhtii. Soitet lohkat daid cealkkámušaid, muhto eai dat jur váikkut dasto daid mearrádusdahkamis.
