Kárášjohkalaš duodjebuvddas šealgájit holberávddat, silba- ja golledearrasat, satiinnat ja silkeárpput. Máiju Siggá Seurujärvi čalmmit leat darvánan glitterláđđái.
– Anárašgáktái dát gal soabašii, dat lea muđui nu dábálaš. Muhto livčče gal oalle extra, dakkár bilemááccuh (gákti), smiehttá Seurujärvi.
21-jahkásaš Máiju Siggá Seurujärvi lea eret Bárttehis, Anára nuorttaosiin. Son gullá Muttošjávrri bálgosii, ja boazodoallu leage su váldobargu. Dálvvi son lea meahcis, muhto dál geasseáigge sus lea áigi duddjot.
Son goarui vuosttas liidnegávttis badjeskuvlaahkásažžan. Das de álggii mokta duddjot. Vehážiid mielde son oahpahalai duddjot earáge dujiid.
– Mu máttaráhkut leigga áibbas dovddus duojárat, erenomážit čuoldin- ja njuikkuhandujiin. Mun iešge liikon daidda ja go mun čuolddán dahje njuikkahan, de liikon smiehttat máttaráhkuguoktá, ahte dál mun barggan seamma hommáid maid soai leaba bargan.
Máiju Siggá Seurujärvi lávege áittis roggat iežas máttaráhkorohkiid dujiid ja dutkkadit daid. Sutnje lea dehálaš, ahte dovdá justa iežas soga vuogi goarrut ja hervet.
– Jus vaikke gii nu diŋgošii mus eará guovllu gávtti go maid su sohka geavaha, de mun in duddjoše dan.
Dološ dujiid lassin Seurujärvi ohcá inspirašuvnna iežas dujiide sosiála medias. Son lea rabas buotlágan treanddaide, muhto ovdamearkka dihte minsttariid dahje hervenmálliid son ii hálit rievdadit.
Dál son lea plánen goarrut liidnegávtti beallemasgággás, mii lea vuordán su skáhpes juo guhká.
– Das boađášii árgabeaigákti. In mun árgabeivviin geavat dábálaččat gávtti, muhto dat ii livčče nu hearvái. Dan háliidivččen duddjot, jáhkán geavahivččen dan olu.
Eallá iežas niehkoeallima
Máiju Siggá Seurujärvi eallá aiddo dál iežas niehkoeallima. Son ii olus leat jurddašan boahttevuođa birra, muhto sávašii goit, ahte basttášii dalle maid eallit boazodoalus ja duojis.
– Háliidivččen goit jurddašit ahte dainna birge, muhto iihan dainna gal rikkisin šatta. Dat leat goit guokte ášši, mat leat mu váimmu lahka, de mun háliidan bargat daid, vaikke ii dinešii nu.
Seurujärvi lea dál vehážiid mielde duddjogoahtán aisttan ámmátlaččat ja váldigoahtán maid muhtin diŋgojumiid vuostá.
Dán áigge go duddjo bargun, de galgá leat ovttalágan fitnodatdoalli. Galgá smiehttat ovdamearkka olu márkanastima ja eará bargguid, mat fitnodatdoallái gullet, muitala son.
– Lean smiehttan, mo mun máinnun ahte mus sáhttá diŋgot ja oastit dujiid, go boazohommát lea goit mu váldobargu. Dát lea dušše geassit, ferte vissa duddjot rádjui geassit ja go geargá, de johtá márkanis vuovdimin daid. Dahje dasto ferten bálkkáhit geannu doalvut daid, smiehtada Máiju Siggá Seurujärvi.
– Dálvi ja giđđa lea nu fuones áigi, in mun gal dalle vuolgge gosage. Millosabbot lean meahcis, lohká son.
