Eanabuollimat Anárjávrre sulluin leat barggahan gádjunlágádusa lassin maiddái Meahciráđđehusa. Go gádjunlágádus lea geargan čáskkadeamis buollima, de leamašan Meahciráđđehusa bargun báhcit fáktet buollán eanaguovllu.
Meahciráđđehusa virkkosmahttingeavahusa earenomášáššedovdi Kirsi Ukkonen muitala, ahte sis eai leat álot leamašan doarvái bargit fáktemii ja sii leat gártan bálkkáhit dollafávttaid olggobealde dálu. Buollimat leatge šaddan Meahciráđđehussii divrrasin ja dat váikkuhit maiddái dálá bálvalusaide.
– Jus dál leat guđa háve šaddan vuolgit dohko jávrri ala, de dáthan šaddá jo máŋgalogiduhát euro. Dat lea juo muđuige unna ruhtaresurssain ja geahpeduvvon bargoveagas eret ja váikkuha vánddardeaddjiid bálvalusaid bajásdoallamii muđuige. Dain ruđainhan mii galgat daid goluid máksit, čilge Ukkonen.
Diibmá Meahciráđđehus geahpedii bargiid garra gieđain seastimiid geažil. Dat lea dagahan váttisvuođaid gávdnat olbmuid fáktet buollán eanaguovlluid, dovddaha Ukkonen.
– Gal dat váikkuha, go olbmot leat uhcán. Leamašan čuolbma oažžut olbmuid vuolgit, ahte gean mii dohko sáddet.
Jus dál dolastallá, de gal oažžu sáhku
Suoidnemánu bealle muttu maŋŋá leamašan eanabuollimat guđa eará Anárjávrre sullos.
Lappi gádjunlágádusa gohcci buollinčáskkadanmeašttir Tuomas Korhonen muitala, ahte eanabuollimat leat árvalusaid mielde álgán fuollameahttun dolastallamiin. Buollimat leamašan guhkkin sulluin ja čáskkadanbarggut leatge eret buot eará hohpolaš gádjunbargguin.
– Sáhttá ádjánit diibmoviissáid ovdal go mii ollet báikki ala ja muhtumin šaddat maid geavahit helikoptera veahkkin. Dat leat guhkes prošeavttat, go vuolgit guhkás gádjundoaimmaide. Muhtumin ádjánit čáskkadanbargguin jándoriidge.
Dálá dilis Anára ja Ohcejoga gielddain lea eanabuollinváruhus fámus, ja danin dola ii leat dál lohpi dahkat. Ovddasvástádus čáskkadangoluin lea álot vahátdahkkis.
– In dál hálit baldalit geange, muhto jus dolastallamis gávnnahallá, de das ráŋggáštuvvo sáhkuin. Olbmot fertejit leat fuolalaččat vai min resurssat ollet buorebut hohpolaš gádjundoaimmaide, rávve Korhonen.
Gádjunlágádus lea dahkan Anárjávrre eanabuollimiin almmuhusaid bolesii. Gádjunlágádus ja Meahciráđđehus ávžžuhit olbmuid geavahit dušše gásavuoššanbiergasiid eanabuollinváruhusa áigge.
