Ijahis idja -festiválas besset maid ođđa artisttat lávket lávddi ala. Dán jagi áigu maid Ántte Issát Länsman Njuorggámis fitnat ovdanbuktimin Taleantalávddis lávvardaga. Son lea Taleantalávddi nuoramus loaiddasteaddji.
– Vehá lea speanta. Juoiggan Čáhppesduoddara ja Čálkko-Ándde.
Son lea hárjehallan veháš ovddalgihtii juoigat luđiid.
Länsmana bearrašis musihkka gullo beaivválaččat. Su eadni lea jo guhká bargan musihkain ja oabbáge čuojaha jo fijuliinna. Ántte Issát Länsman muitala, ahte liiko juoigat.
– Dat, ahte beassá čájehit, ahte máhtán bures juoigat.
Buorre vejolašvuohta ođđa artisttaide
Taleantalávdi lea lávvardaga diibmu 16.30. Doppe leat loaiddasteamen Länsmana lassin Laura & the Guitar Heroes of Ohcejohka, Kootkmiõhtt, KONES ja Jezebro.
Ijahis ijas leamašan taleantalávdi jo moadde jagi, ja dat lea erenomáš báiki ođđa artisttaide čájehit čehppodagaset. Festivála veahkkebuvttadeaddji Aleksi Ahlakorpi dadjá, ahte ovttainge bihtáin beassá taleantalávdái loaiddastit.
– Jus leat artisttat, geain ii leat diibmoguhkkosaš konsertii vel materiála, muhto besset goit leat festiválaartisttat. Maiddái loktet namaid maid olbmot eai vel dovdda.
Taleantalávdái sáhttet artisttat ieža fállat iežaset ovdanbuktimiid ja maiddái festivála lágideaddjit jerret mielde ođđa artisttaid, maid leat gullan.
– Dál sáhtášii jo boahtte jahkái álgit plánet dan. Jus lea soames artista, geas eai leat vel aivve gárvves bihtát, de dál lea jahki áigi ráhkkanit, rávve Ahlakorpi.
Mánáid- ja nuoraidbeaivi bearjadaga
Festivála álgá bearjadaga mánáid- ja nuoraidbeivviin. Prošeaktabargi Anni-Sofia Niittyvuopio muitala, ahte báikki ala leat boahtimin goit 280 skuvllalačča.
Doppe leat bargobájit, disko gos lea sámi DJ, ja de árbevirolaččat gaskabeaivve maŋŋá Násttážat-konsearta, gos iešguđet guovlluid skuvllalaččat besset loaiddastit.
– Doppe leat ovdamearkka dihte Kootkmiõhtt Čeavetjávrris, Badje-Deanu mánát Gáregasnjárggas ja juoigit Anáris, logahallá Niittyvuopio.
Maiddái Ravggon-joavku ja dán jagáš eamiálbmotguossi Ed Littlefield loaiddastit mánáid ja nuoraid lassin.
Niittyvuopio sávvá, ahte earátge boađášedje čuovvut mánáid ja nuoraid loaiddastemiid.
– Dán jagi Anára gielda ordne giellakafea festiválaguovllus Násttážat-konseartta áigge. Sávvamis leat maiddái vuorrasut olbmot čuovvumin min konseartta ja ovttastallamin kafeas, dadjá son.
