– Mis lea heahti. Borgemánus vahku siste 908 vuolláičállosa adressii, mainna muitaleimmet fuola seaŋgaossodaga seailumis, celkkii Ohcejoga gieldda buresveadjinhoavda Pirjo Seurujärvi gaskavahku Lappi buresveadjinguovllu virgeolbmuide.
Gielddadálus ordnejuvvui dilálašvuohta, gos ohcejohkalaččat besse muitalit iežaset fuolaid dearvvašvuođa- ja sosiálabálvalusaid oažžumis boahttevuođas.
– Moson dat boahttevuođas ordnašuvvá jus buohccát dahje go boarásmuvat, gii dikšu, ja buot earáge áššit, mat gusket olbmo buresveadjimii, hálidii ealáhatolmmoš Vuokko Hirvonen diehtit.
Ohcejogas ballet, ahte dearvvasvuođabálvalusat gárgidit boahttevuođas vel máddelabbui go Avvilii. Lappi buresveadjinguovlu lea giđđat cealkán, ahte seaŋgaossodaga doaibma boahtá nuppástuvvat.
Geassit gieldda njunnošat čálle átnumuša seaŋgaossodaga bálvalusaid seailluheami bealis. Seammás čogge maid vuolláičállosiid ja dat bohtege badjel 900. Átnumuš oktan vuolláičállosiin doaimmahuvvui buresveadjinguovllu ráđđehussii borgemánus.
Eahpesihkkarvuohta deaddá ain, muhto ságastallan lei buorre
Buresveadjinguovllu dearvvasvuođahoavda Miia Palo sávvá, ahte dilálašvuođa maŋŋá ohcejohkalaččain eai livčče šat beare olu fuolat boahttevuođa ektui.
– Doaivvu mielde fuolla ložžii das, ahte bálvalusat livčče gárgideamen guhkelabbui. Ulbmilin ii leat sirdit bálvalusaid dađi guhkelabbui, go maid dat dál leat, dajai Palo ságastallandilálašvuođa maŋŋá.
Olbmot jearahedje ja čavggahedje viššalit buresveadjinguovllu virgeolbmuid. Vehá goit orui vel muhtumiin báhcán eahpesihkkarvuohta, vaikko muđui báziige buorremiella ságastallamis.
– Vehá várra dakkár dihtoláhkai maid positiivalaš jurdda, ahte ferte luohttit daidda virgeolbmuide maid dat lohpidit ja plánejit. Ammal dat manná bures. Olmmoš ferte luohttit dasa, smiehtadii Vuokko Hirvonen.
