Ráhkis mánás leat máŋga nama, lávejit dadjat. Ruoššaluossa ja buggeluossa leat dábálamosat, mat dán áigge gullostit go lea sáhka Jaskes ábi luosas, mii lea leavvagoahtán davviguovllu jogaidege. Sámi giellagáldu lea jagis 2021 normeren guoli namman ruoššaluossa ja gubbeluossa.
Jearaimet Deanuleagi ássiin, mii sin mielas lea buoremus sátni dán guollái.
Emeritusprofessor Pekka Sammallahti Ohcejogas muitala, ahte ruoššaluossa leamaš jo guhká anus Deanuleagis.
– Mun jáhkán, ahte dat lea dat árbevirolaš namahus, mii lea dihtton dalle 1960-logus, vissa 1950-logu rájes jo.
Bárssi Piera Kari, Kari Guttormge lea oahppan jo mánnávuođa rájes geavahit ruoššaluosa namahusa. Son muitá, ahte su eahki gottii 1970-logus jo muhtin ruoššaluosa Deanus.
– Dat lea agibeaivve leamaš mis dat ruoššaluossa, ii miige eará.
Väino Guttom fas muitala, ahte su áhčči lei addán iežas namahusa ođđa luossaguollái.
– Ruoššaluossa dahje manin dat daddjo dál, de dathan leamaš jo dáppe guhkes áigge, 1960-logus jo leamaš. Áhčči lávii gohčodit dan Petčora luossan.
Muhto namahusat eai dasa vel noga, Jávrri Juhán Niillas, Niilo Aikio mielas lussii heivešii buoremusat namahus gurpeluossa.
– Dashan lea gurpi sealggis. Gurpeluossa livčče vuogas, go dat sulastahttá gurpeolbmo vaikko go dat lea gurppiin vuodjalan jávrái, čilge Aikio.
Deanu giellagátti jođiheaddji Sverre Porsanger muitala, ahte son lea gullan gubbeluossa namahusa.
– Iŋggoš-Máhte Jovnna Kárášjogas muitalii, ahte sin eadni lávii gohčodit dan dolin gubbeluossan. Dashan lea gubbi, jorba čielgi.
