Avvilis gaskavahku dáhpáhuvvan bealtabiilla gopmáneames roasmmohuvve oktiibuot 23 soalddáha.
Avvilis soalddáhiid fievrridan bealtabiilla gopmáneame bolesdutkan lea ovdánan.
Boles dutká lihkohisvuođa johtolatdorvvolašvuođa dorvvuhuhttináššin fievrru fártta ja liigelástta oasil. Boles dutká maid soahteveaga skuvllejeaddji ovddasvástádusa go son lea mearridan vuoddji bealtabiilla fievrredeapmái.
Rihkusnamahussan dás lea giktaleapmi johtolatdorvvolašvuođa dorvvuhuhttimii ja bálvalanrihkus. Boles árvala ahte ovdadutkan bistá vel mánotbajiid.
Rádjegozáhusa ja bolesa lassin Avvila dáhpáhusaid dutkagoahtá maid Lihkohisvuođadutkanguovddáš OTKES.
Lihkohisvuođadutkanguovddáža rolla lea earálagan go bolesa. OTKESA dorvvolašvuođadutkamis eai oza sivalaččaid eaige gieđahala vagátbuhtadusáššiid.
Lihkohisvuođadutkanguovddáža dutkamat bistet dábálamosit sullii 9–12 mánotbaji.
Avvila gaskavahku lihkohisvuođas roasmmohuvvan soalddáhiin guđas leat dutkojuvvon ja ožžon divššu Roavvenjárggas guovddášbuohcceviesus.
17 eará soalddáha leat dikšojuvvon Avvila dearvvasvuođaguovddážis, sis leat leamaš dušše smávit váttut.
Avvila rádjejeagárkompaniijai ledje idjii ordnen buohccedivššárgohcima soalddáhiidda. Doavttir dárkkista otná beaivve áigge soalddáhiid veaju.
Rádjejeagárkompaniijas ordnejedje gaskavahku kriisaveahki olles bargovehkii ovttas Avvila dearvvasvuođaguovddáža kriisaveahkkejoavkkuin. Ságastallanveahki fállet maiddái vel otne ja boahttevaš vahkuid áigge dárbbu mielde.
Avvila rádjejeagárkompaniija joatká báhčinhárjehusaid otne, muhto lihkohisvuođa mielde leamaš soalddáhat eai oassálaste daidda.
Bálvalusgeatnegasaid ovdduidgohcinorgána Varusmiesliitto lea fuolas gaskavahku Lappi rádjejeagarkompaniijas dáhpáhuvvan lihkohisvuođas. Dan mielas lea dehálaš dál lihkohisvuođa dutkamis čielggadit, ahte leago bálvalusdorvvolašvuođas fuolahuvvon doarvái.
– Lea fuolasmahtti, ahte ná stuorra lihkohisvuohta lea dáhpáhuvvan. Mii čuovvut dárkilit, mii das čielgá, manin ná lea beassan geavvat ja mo fuolahat das, ahte ná ii šat geava, dadjá Varusmiesliitto ságadoalli Elina Riutta.
Riutta mielas oktage dákkár lihkohisvuohta lea liiggás.
Ikte iđđes gopmánii Avvilis bealtafievru, mas roasmmohuvve 23 soalddáha. Njealjis sis dolvojuvvojedje gitta Roavvenjárgii guovddášbuohccevissui. Boles dutká lihkohisvuođa johtolatdorvvolašvuođa dorvvuhuhttimin ja bálvalusrihkkosin.
Lappi rádjegozahusa almmolašhoavda Mikko Kauppila muitala, ahte Roavvenjárgii leat dál beaivvi miel dolvojuvvon vel guokte soalddáha lasi guovddášbuohccevissui dikšui.
Avvila dearvvasvuođaguovddážis leat dál 19 soalddáha oažžumin divššu.
Boles lea dutkamin lihkohisvuođa siva. Bolesa mielde sáttogeainnus, gos lihkohisvuohta dáhpáhuvai, lei dábálaš siivu. Geainnu alde ii lean muohta iige dat lean jikŋon.
Boles dutká maid lihkohisvuođafievrru lástema. Álgodieđuid vuođul bealtafievrrus ledje fárus eambo olbmot go lea lobálaš.
Boles dutká dán muttus lihkohisvuođa johtolatdorvvolašvuođa dorvvuhuhttimin ja bálvalusrihkkosin.
Dutkan joatkašuvvá earet eará buohkaid gullamiin. Boles ii muital dutkamis dađi eanet.
Avvila dearvvasvuođaguovddáža doavttir Outi Liisanantti muitala, ahte soalddáhiin lei buorre lihku lihkohisvuođas.
– Lihkus deaivvai dábálaš árgabeaivi ja buot ámmátolbmot leat barggus.
Liisanantti muittuha, ahte gažaldagas lea stuorralihkohisvuođa dilli ja vejolašvuođat dasa, ahte soalddáhiidda livčče sáhttán geavvat vearrábutge.
Soalddáhat sirdašuvvet Avvila dearvvasvuođaguovddážis várusgotti buohccevissui joatkadikšui.
– Avvila dearvvasvuođaguovddáža doavttir manná ihttin vel várusgotti buohccevissui dutkat soalddáhiid ođđasit, jus sin veajus dáhpáhuvvat nuppástusat, muitala Liisanantti.
Liisanantti muitala, ahte maiddái Anára gieldda kriisajoavku addá psyhkalaš veahki.
Lappi rádjegozahus lea leamaš oktavuođas lápmašuvvan soalddáhiid oapmahaččaide ja joatká ain sin fáhtema.
Lappi rádjegozahusa almmolašhoavda Mikko Kauppila muitala, ahte Rádjejeagárkompaniijai ordnejit otne kriisaveahki.
Kauppila ii dieđe man gallis leat lápmašuvvan ja man vearrádit.
– Boles dutká ášši, dađi dárkilut dieđuid lihkohisvuođa sivain eat muital dán muttus eanet, dadjá Kauppila.
Kauppila muitala, ahte lihkohisvuohta dáhpáhuvai iđđes go soalddáhat ledje mannamin báhčinhárjehusaide. Bealtafievru gopmánii, muhto eambo son ii muital dáhpáhusbáikkis.
Báhčinhárjehusaid gaskalduhtte lihkohisvuođa dihte. Hárjehusaide oassálaste badjelaš 100 olbmo.
Lappi gádjunlágádus oaččui gaskavahku 13.11. diibmu 8.54 almmuhusa geaidnobárttis, mas Lappi rádjegozáhusa rádjejeagarkompaniija bealtafievru lea gopmánan hárjehusguovllus.
Fárus ledje 23 soalddáha, main guovttis leaba lápmašuvvan vearrábut ja sáddejuvvon Roavvenjárgii guovddášbuohccevissui. 21 soalddáha fas leat dolvojuvvon Avvila dearvvasvuođaguovddážii.
Báikki ala ledje mannan guhtta gádjunlágádusa ja vuosttasveahki ovttadaga Avvilis ja lagašguovllus sihke rádjejeargarkompaniija bargoveahka ja fievrrut.
Gádjunlágádus veahkehii vuosttasvehkiin lápmašuvvan soalddáhiid ja govččai boaldámuša golgama lihkohisvuođafievrrus.
Lappi boles lea dutkamin lihkohisvuođa siva.
Áššis muitalii vuosttamužžan MTV Ođđasat. Sin dieđuid mielde eará olbmuid leat jorgalahttán eret, go bargoveahka dikšu lápmašuvvan soalddáhiid.
